Газ ходими пора устида қўлга олинди
Б.Набиев (исми шарифи ўзгартирилган) хизмат мавқеидан фойдаланиб, ўзганинг мулкини ишончини суиистеъмол қилиб, фирибгарлик йўли билан қўлга киритиш мақсадида, 2022 йил 21 июнь куни Шароф Рашидов туманида яшовчи Б.Кабировга тегишли хонадонда газ ҳисоблаш ускунаси ўрнатмасдан ноқонуний равишда табиий газдан фойдаланиб келаётганлиги ҳақида 2022 йил 2 июнь куни расмийлаштирган “Хатлов далолатномаси”ни бўлимга топширмаслик ва унга нисбатан жарима қўлламаслик эвазига 2.600.000 сўм пулларни фирибгарлик йўли билан талаб қилиб, ушбу пулларни унинг яшаш хонадонида олган вақтида ашёвий далиллар билан Иқтисодий жиноятларга қарши курашиш Департаментининг Жиззах вилоят бошқармаси ва Шароф Рашидов тумани бўлими, вилоят прокуратураси ҳамда ДХХ вилоят бошқармаси ходимлари билан ҳамкорликда ўтказилган тезкор тадбир давомида ушланган.
Суд мажлисида Б.Набиев айбига тўлиқ иқрорлик билдирди.
Суд томонидан Б.Набиевга Ўзбекистон Республикаси ЖК 25,168-моддаси 3-қисмининг “в” банди билан ЖКнинг 45-моддасига асосан 1 йил муддатга муайян ҳуқуқдан, яъни давлат иштирокидаги корхона, муассаса ва ташкилотларда моддий мансабдорлик лавозимларида ишлаш ҳуқуқидан маҳрум қилиниб, ойлик иш ҳақининг 20 фоизи миқдорини давлат даромади ҳисобига ушлаб қолган ҳолда, 2 йил муддатга ахлоқ тузатиш ишлари жазоси тайинланди.
Мазкур жиноят иши Жиззах вилоят суди апелляция инстанциясида кўрилиб, Б.Набиевга нисбатан чиқарилган ҳукм ўзгаришсиз қолдирилди.
Лутфулла Мамаражабов,
Жиззах вилоят судининг судьяси
