Франция собиқ бош вазири рафиқасини сохта ишга жойлаштиргани учун 5 йилга озодликдан маҳрум этилди

Франциянинг собиқ бош вазири Франсуа Фийон давлат маблағларини талон-торож қилгани учун беш йилга озодликдан маҳрум этилди. Бу ҳақда Meduza хабар берди.

Собиқ сиёсатчининг рафиқаси Пенелопа Фийон шерик сифатида уч йилга шартли равишда озодликдан маҳрум этилди. Шунингдек, уларнинг ҳар бири 375 минг евро жаримага тортилди.

1998 йилдан 2013 йилгача Франсуа Фийоннинг рафиқаси ва икки фарзанди унинг ёрдамчиси, шу жумладан,  Франция Миллий ассамблеяси депутати сифатида ишлаган. Амалда эса улар ҳеч қандай иш бажармаган. Шу тариқа оила 1,08 миллион еврони қўлга киритган.

Жаримадан ташқари, улар ёлғон йўл билан олинган пулларни қайтариши керак бўлади. Шунингдек, Франсуа Фийонга 10 йил давомида сайланадиган лавозимни эгаллаш ҳам тақиқланди.

Маълум қилинишича, суд Фийонларни ҳибсга олишга ордер бермаган ва улар суд залини тарк этган. Уларнинг адвокатлари суд қарори устидан шикоят қилади.

Франсуа Фийонга нисбатан айблов 2017 йилнинг март ойида, Францияда президентлик сайлови кампанияси давом этаётган пайтда эълон қилинган. Фийон ўнглар ва марказчилардан номзод бўлган, у президентлик пойгасида фаворит сифатида кўрилган. У тергов кетаётган бўлса ҳам сайловда иштирок этишдан бош тортмаган.