Февраль ойида Россиянинг нефт даромадлари кескин камайди — ХЭА
Февраль ойида Россиянинг нефт даромадлари кескин камайди. Халқаро энергетика агентлиги экспертлари бунда санкцияларни асосий сабаб деб аташди.
2023 йил февраль ойида Москва нефт экспортидан 11,6 миллиард доллар даромад олди. Ўтган йили эса бу кўрсаткич 20 миллиард долларни ташкил қилган эди. Шу билан бирга, Россия етказиб бериш ҳажми деярли ўзгармади ва нефтнинг 70 фоизи Хитой ва Ҳиндистонга етказиб берилди.
"Бу G7 мамлакатларининг санкция режими самарали бўлганидан далолат беради. Чунки санкциялар режими нефт ва нефт маҳсулотларини глобал етказиб беришни чекламади. Шу билан биргаликда аксинча, Россиянинг экспортдан тушум олиш имкониятини чеклади", — дейилади Халқаро энергетика агентлиги баёнотида.
Шунингдек, агентлик экспертлари Россия нефтининг катта қисмини (кунига тахминан 4,5 миллион баррел) Осиё, Африка ва Яқин Шарқдаги янги бозорларга йўналтиришга муваффақ бўлганини қайд этишди.
