Фарғона вилояти ҳокимининг буйруғи тадбиркорлар ҳуқуқларини бузмоқдами?
Тахминан 1 йилдан бери Фарғона вилоятида асосан умумий овқатланиш жойлари, умумий дам олиш масканлари аввалига вилоят ҳокимининг оғзаки буйруғи билан, кейинчалик ёзма буйруғи асосида соат кечки 22:00дан ички ишлар ходимлари мажбурий қистови билан ёпилмоқда (бундай буйруқни шахсан кўрмаганман, лекин ички ишлар ходимлари шу буйруқни асос қилиб ҳаракат қилишмоқда).
Вақт ҳам ҳар ҳил белгиланган; чекка туман ва қишлоқларда соат 21:00 дан бошлаб беркитилса, шаҳарларда 22:00да, айрим ҳолларда эса 22:30дан бошлаб тадбиркорлар фаолияти мажбурий чекланмоқда.
Куни кеча Фарғона шаҳрида жойлашган мавсумий умумий овқатланиш муассасасида юқоридаги ҳолатнинг гувоҳи бўлиб, раҳбари билан бироз суҳбатлашдим.
Раҳбарнинг айтишича, ёзнинг иссиқ кунлари ва кундузги иш вақти сабабли мижозлар кундузи кўп ташриф буюрмасликлари, асосан, кечки 20:30, 21:00 дан кейин келишади. Мижозлар, асосан, шаҳримиз меҳмонлари, хусусан, туристлар ҳам кафега келиб ўтирганда, вилоят ҳокими қарори (ёки буйруғи) туфайли фаолиятлари мажбуран чекланиб, ёпишга мажбур қилинмоқдалар.
Раҳбар мавсумий бўлишига қарамай 25-30 нафар ишчини қонунан, давлат рўйхатидан ўтказган ҳолда ишлатаётганини, ойига шаҳар бюджетига 15-16 млн сўм солиқ тўлаётганини, агар кечки чекловлар бўлмаса, ишчи сонини 50 нафарга етказиш, солиқни ҳам 20-25 млн сўмга қадар кўтариш (МЧЖ сифатида фаолият юритар экан, қанча тушум кўп бўлса, солиқ ҳам кўпроқ бўлади, албатта) имкони борлигини айтди.
25 нафар ишчини ишлатиш осонми?
Уларнинг ойликларидан ташқари ҳар бирини тиббий кўрикдан ўтказиб, меҳнат дафтарчалари олиб, ҳар ой ЭКИҲнинг 1 баробари (202 000 сўм) миқдорида пенсия фондига пул тўлаб (202 000 × 25= 5.000.000 сўм, яъни ишчиларни келажакда оладиган пенсияси учун ҳам ҳар ой пул тўламоқда) ишлатаётган тадбиркорга раҳмат айтиш керак, аслида. Тадбиркор ишчилар сонини 50 нафарга етказмоқчи, агар суткалик режимда ишлашга рухсат берилса.
Суткалик (24 соат) фаолият юритишни сўраб, мурожаат қилмаган ташкилоти қолмабди. Прокуратура, ҳокимият, тадбиркорлар маркази, яна бир қанча Тошкентдан келган ишчи гуруҳ вакиллари тадбиркорнинг қўйнини пуч ёнғоққа тўлдириб кетишибди. Бошқа тадбиркорларнинг айтишларича, юқоридаги тадбиркор саховат, хайр ишлари билан доимий ва фаол қатнашиб ҳам келар экан.
Бу бир мисол холос, бундай ҳолатдаги тадбиркорлар биргина Фарғона шаҳрининг ўзида юзлаб топилади.
Президент ҳар икки гапининг биттасида «тадбиркорга эркинлик бер, тадбиркорга имконият қил, тадбиркорга ёрдам бер, бир нафар ишчи ўрни яратган тадбиркорни бошимга кўтараман» деб турганида, шундай сунъий тўсиқлар билан ўнлаб ишчи ўрни яратмоқчи тадбиркорларнинг шаштини қайтариш қанчалик тўғри?
Туристлар сонини бир неча миллионга етказиш режаларимизга, эҳтимол, бундай тўсиқлар халақит бераётгандир.
Билмоқчи бўлганим бу вазиятда вилоят ҳокимлигининг тадбиркорларни ишлаш вақтини чеклаши қонунан мумкинми?
Яъни ҳеч қандай уруш, фавқулодда ҳолат бўлмаган, тинчлик ҳукм сурган, одамлар дам олиш учун тунда кўчаларга чиқадиган мавсумда соат 22:00даёқ ҳамма жойларни мажбуран ёптириб қўйиш фуқароларнинг Конституцион ҳуқуқларини, тадбиркорларнинг ҳуқуқларини чекламайдими?
Қани ОАВларда бот-бот тадбиркорларга ёрдам ҳақида чиройли гапларни гапирадиган ташкилот ходимлари борми?
Шу вазиятда бутун вилоят тадбиркорларига ёрдам ёки енгиллик олишлари учун фақат оғизда ёки қоғозда эмас, реал ёрдам бера оласизларми?
Мақсадим юқоридаги ҳолат юзасидан кимнидир қоралаш, айблаш эмас.
Ички ишлар ходимлари ҳам мажбурий равишда, ҳокимият буйруғи сабабли иш кўришаётгани аниқ.
Бу буйруқ қачон ва нима сабабли чиққанидан ҳам бехабарман.
Лекин ҳозирги тинчлик замонида, тадбиркорлар ишлайдиган вақтда уларга сунъий тўсиқ бўлаётган бу буйруқ мантиқсиздек кўринмоқда.
Ҳеч бўлмаганда, ёз мавсумида соат 24:00гача ишлашга рухсат бериш керак.
Мавзуга алоқадор мутасадди ташкилотлар, Фарғона вилояти ҳокимлиги, Вилоят тадбиркорлар маркази юқоридаги вазият юзасидан аввало тадбиркорларга кўмакчи бўлишади, қолаверса, кундузги иссиқ ва узоқ давом этган иш вақтидан кейин дам олиш учун кўчага чиққан шаҳримиз аҳолиси, меҳмонлари, жумладан, туристларнинг ҳордиқ чиқаришига ёрдамларини аяшмайди, деган умиддаман.
Олимжон Ҳайдаров, ЎзЛиДеП аъзоси
Manba: sof.uz
