Эронга қарши урушнинг Трамп яширишга уринаётган сабаби ўртага чиқди

Америкаликларнинг салмоқли қисми президент Дональд Трампнинг Эронга қарши уруш бошлаши Жеффри Эпштейн иши билан боғлиқ деб ҳисоблайди.

Newsweek нашри ёзишича, жорий йил 6-8 март кунлари аҳоли ўртасида ўтказилган ижтимоий сўров натижаларига қараганда, 52 фоиз респондент Трамп Эрон урушини жамоатчиликни Эпштейн можаросидан чалғитиш учун бошлаган деган фикрда.

Демократларнинг катта қисми (81 фоиз) Трампнинг Теҳронга қарши ҳарбий авантюраси айнан Эпштейн ҳужжатлари билан боғлиқ деган нуқтаи назарни билдирган.

Республикачилар орасида бу фикрни ёқлайдиганлар салмоғи камроқ (26 фоиз).

Сўровнома Data for Progress томонидан ўтказилган.

“Ер куррасининг у чеккасидаги мамлакатни бомбардимон қилишни эълон қилиш билан Эпштейн иши йўқ бўлиб қолмайди, Доу-Жонс индексининг 50000 дан кўпроққа қулаши ҳам ғойиб бўлмайди”, деган Конгресснинг Вакиллари палатаси аъзоси Томас Масси.

“Урушнинг авж олгани сабаби, Дональд Трамп ва Оқ уйдаги бошқа шахслар, шунингдек, шу доирадаги бошқа кишилар номи Эпштейн досьесида зикр қилинган. Улар биз бундан хабар топганимиздан даҳшатга тушган”, – деган сиёсатчи Грэм Платнер.

Туркия матбуоти хабар беришича, Конгресс аъзоси Тед Лью Эпштейн ҳужжатларида Трамп вояга етмаган болаларга нисбатан зўравонлик қилгани ҳақида айблов бўлиши мумкин деган айбловни илгари сурган.

АҚШ матбуотига кўра, Адлия вазирлиги Эпштейн ҳужжатларини эълон қилишда Трампга алоқадор қисмини яширган. Федерал тергов идораси томонидан 2019 йил июль ойида сўроқ қилинган бир аёл 35 йил аввал, 13-14 ёшда эканида Трамп томонидан зўрлангани ва калтакланганини айтган.

Аввал хабар берганимиздек, АҚШ Адлия вазирлиги 2025 йил декабрь ойидан молиячи Жеффри Эпштейн ишига доир кенг кўламли материалларни очиқлашни бошлади.

Ҳужжатлар АҚШ Конгресси томонидан маъқулланган ва президент Трамп томонидан имзоланган “Эпштейн файллари ошкоралиги тўғрисидаги акт” (Epstein Files Transparency Act) доирасида эълон қилинмоқда.

2000 та видеоёзув ва 180 мингта сурат, жами 3,5 миллион саҳифани ўз ичига олган ҳужжатларда кўплаб машҳур шахсларга қарши компромат мавжуд экани айтилмоқда.

Жеффри Эпштейн – расман молиячи, амалда эса ХХ–ХХI асрнинг энг даҳшатли шахсларидан бири. Унинг номи болаларга қарши жиноятлар, элита учун яратилган яширин “қуллик тизими”, сиёсатчилар, миллиардерлар ва қироллик оилаларига боғлиқ шубҳали алоқалар билан тарихга муҳрланди. 2019 йил август ойида қамоқда ўз жонига қасд қилган Эпштейн пул орқали қонунни, ахлоқни ва одамлар тақдирини сотиб олиш мумкинлигини амалда исботлаб берган иблис дея таърифланмоқда.

Трампнинг ўзи Жеффри Эпштейн томонидан вояга етмаган қизлар зўрланганига оид ишларга буткул алоқаси йўқлигини айтган.

Маълумот ўрнида: АҚШ ва Исроил жорий йил 28 февраль куни Эрон шаҳарларини бомбардимон қилишга киришар экан, Теҳрон ҳукумати ядро қуролига эга бўлишга яқин келиб қолганини иддао қилган эди. Жумладан, Трамп урушнинг илк кунида Эронга қарши урушдан кўзланган мақсад “Америка халқини яқинлашиб келаётган таҳдидлардан ҳимоя қилиш” эканини айтган эди.

Кейинроқ АҚШ мулозими урушдан кўзланган мақсад Эрондаги нефть конларини қўлга киритиш эканини очиқ айтди.