Энг ибратли оила бошлиғи

Энг ибратли оила бошлиғи

Шубҳасиз, Расулуллоҳ (соллаллоҳу алайҳи ва саллам) инсоният учун намуна ва тақлид қилинадиган зотдирлар. У зот мусулмон эр муслима аёлга нисбатан қандай муомала қилиш, унинг ҳис-туйғуларига қандай риоя этиш, эр-хотин ўртасидаги муҳаббат ва раҳмат қандай бўлишини гўзал суратда ўргатиб ўтганлар.

Расулуллоҳ (соллаллоҳу алайҳи ва саллам)нинг аёллари олдига кириб-чиқишларида ҳам бир низом бор эди. У зот ҳар куни эрталаб аёллари олдига кирар ва уларга салом бериб, ҳақларига дуо қилар эдилар.

Ибн Аббос (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам) бомдод намозини ўқиб бўлаганларидан сўнг ўша жойда ўтирар эдилар. Одамлар ҳам у зотнинг атрофида ўтиришарди. Қуёш чиққанидан кейин бирма-бир ҳамма аёлларининг олдига кириб, салом берар ва ҳақларига дуо қилар эдилар. Қайси бирининг навбати келса, ўша уйда бўлар эдилар”.

Аср намозини ўқиб бўлганларидан кейин ҳам уларнинг олдига кирар эдилар. Оиша (розияллоҳу анҳо)дан ривоят қилинади: “Расулуллоҳ (соллаллоҳу алайҳи ва саллам) аср намозини ўқиб бўлганларидан сўнг аёлларининг олдига кирар,  уларга яқинлашар эдилар” (Имом Бухорий ривояти).

Ҳофиз ибн Ҳажар (раҳматуллоҳи алайҳ) “Фатҳул борий”да айтади: “Бу ривоятларни жамлаш мумкин. Яъни, Расулуллоҳ (соллаллоҳу алайҳи ва саллам) куннинг аввалида салом ва дуонинг ўзи билан кифояланар, куннинг охирида эса бирга ўтириб гаплашар эдилар”.

Анас ибн Молик (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам)нинг тўққиз аёли бор эди. Расулуллоҳ улар орасида тақсим қиладиган бўлсалар, биринчи аёлига тўққиз кунда қайтиб келар эдилар. Аёлларининг ҳаммасини ётадиган уйига жамлар эдилар”.

Юқорида айтилган сўзлардан маълум бўладики, Расулуллоҳ (соллаллоҳу алайҳи ва саллам) бу одатдларини тарк қилмаганлар.

Анас (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам) Зайнаб бинт Жаҳшга уйландилар... Сўнгра Расулуллоҳ (соллаллоҳу алайҳи васаллам) у ердан чиқиб, Оиша онамизни ҳужраларига бордилар ва: “Эй уй эгалари, сизларга Аллоҳнинг саломи ва раҳмати бўлсин”,  дедилар. Оиша онамиз: “Сизга ҳам Аллоҳнинг саломи ва раҳмати бўлсин. Аҳлингизни қандай топдингиз? Аллоҳ сиз учун баракали қилсин”, деди. Бас, Расулуллоҳ (соллаллоҳу алайҳи ва саллам) ҳамма аёлларининг ҳужраси олдига бориб, Оиша онамизга айтган гапларни айтардилар. Аёллар ҳам Расулуллоҳ (алайҳиссалом)га Оиша онамиз айтган гапларни айтишар эди”.

Расулуллоҳ (соллаллоҳу алайҳи ва саллам) аёллари ўртасида одил эдилар. Биронтасини бошқасидан афзал билмасдилар. Буни қуйидаги мисолларда кўришимиз мумкин.

Ётоқдаги адолатли тақсимлари. Урва (розияллоҳу анҳу) Оиша (розияллоҳу анҳо)дан ривоят қиладилар. Оиша (розияллоҳу анҳо): “Расулуллоҳ (соллаллоҳу алайҳи ва саллам) бизнинг олдимизда тунашдаги тақсимотда баъзиларимизнинг баъзиларимиздан устун қўймас эдилар. Гоҳида барчамизни олдимизга келар эдилар. Ҳар бир аёлининг олдига қўл теккизмасдан яқин келар эдилар. Ҳатто навбати бўлган хотинининг олдига келиб, унинг олдида тунар эдилар”, дедилар.

Сафар қиладиган бўлсалар, аёллари ўртасида қуръа ташлашлари.

Расулуллоҳ (соллаллоҳу алайҳи ва саллам) сафарга чиқмоқчи бўлсалар, аёллари ўртасида қуръа ташлар эдилар. Қайси бирининг ҳиссаси чиқса, ўшаниси билан сафарга чиқар эдилар. Аёлларидан ҳар бирининг кунини ва кечасини тақсим қилар эдилар. Лекин Савдо бинт Замаъ ўз кунини Оиша (розияллоҳу анҳо)га ҳиба қилган эди.

Оиша (розияллоҳу анҳо)дан Расулуллоҳ (соллаллоҳу алайҳи ва саллам)нинг аёллари билан холи қолганларидаги хулқлари ҳақида сўралди. Шунда Оиша (розияллоҳу анҳо): “Расулуллоҳ сизлар каби бир инсон эдилар. Лекин у зот инсонларнинг карамлиси, хулқи гўзали, қавмининг ичида мулойими ва ҳушчақчақликда каромлиси эдилар”,  деди (Имом Ибн Саъд ривояти).

Manba: azon. uz


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!