Даҳшатли қотиллик! 2012 йилда Эски Жўва бозорида йўқолган қизнинг жасади энди топилди
Ҳали 18 ёшга тўлмаган қиз шу пайтгача бедарак йўқолган дея ҳисоблаб келинган аслида эса қотил унинг ўгай отаси бўлиб чиқди.
Маълум қилинишича, марҳума охирги марта 2012 йилнинг 25 сентябрь куни «Эски жўва» бозорига онасидан 9 ёш кичик бўлган, шаърий ниоҳдан ўтган, улар билан бирга яшаган ўгай отаси С.Т. чақиргани учун борган ва шундан сўнг дараги бўлмаган, деб ёзмоқда Вugun.uz
Мазкур ҳолат юзасидан 2012 йил 11 ноябрь куни туман прокуратураси томонидан одам ўғирлаш ҳолати бўйича жиноят иши қўзғатилган. Тергов натижаларига кўра, айбдор шахсни аниқлаш имкони бўлмагани учун иш бир неча бор ҳаракатдан тўхтатилган.
Жиноят иши 2020 йил 1 апрель куни Бош прокуратура томонидан назорат тартибида ўрганиб чиқилгач, қизнинг бедарак йўқолган ҳолатида қасддан одам ўлдириш жинояти аломатлари мавжудлиги сабабли иш қайта тергов олиб бориш учун пойтахт прокуратурасига юборилган.
Олиб борилган тергов-тезкор тадбири натижасида қиз қотиллик қурбони бўлгани, ўта оғир жиноятлар турига кирувчи қасддан одам ўлдириш жинояти 1984 йилда Сурхондарё вилоятида туғилган С.Т. томонидан содир этилгани аниқланган.
Маълум бўлишича, эркак марҳум қизнинг онаси билан шаръий никоҳдан ўтиб, унинг уйида яшаб келган. Бундан хабар топган С.Т.нинг ота-онаси уни Сурхондарёга чақириб, уйлантириб қўйган. С.Т.нинг оила қурганини билган аёл жанжал кўтарган, оқибатда эркак қонуний никоҳидан ажраган. Марҳуманинг онаси эса оилани моддий таъминлаш учун Туркияга ишлагани кетган.
Шундан сўнг ҳар икки оиласидан ажралган С.Т. қасд олиш учун биринчи аёлининг фарзандлари билан учрашиб юрган ва қулай фурсатни кутган. Қотиллик содир бўлган кунда ўгай қизини бозорга чақириб, қизни собиқ шаръий хотинининг уйидаги ертўлага олиб борган. Қизнинг бўйин қисмини чойшаб билан бўғиб, ўлдириб, жасадни ертўлага кўмиб қўйган.
Айбланувчининг кўрсатмасига кўра, Паркент туманидаги дала ҳовли ўрганилганда ҳақиқатан ҳам уй ертўласида одам суяклари борлиги маълум бўлган. Ҳолат юзасидан 37 ёшли С.Т.га нисбатан Жиноят кодексининг 97-моддаси 2-қисми (Жавобгарликни оғирлаштирадиган ҳолатларда қасддан одам ўлдириш жиноятини содир этгани учун вилоят суди томонидан 20 йилдан ортиқ муддатга озодликдан маҳрум қилинган.
Ҳозирда Туркияда яшаётган марҳуманинг онаси бунга ўзи ҳам айбдор экани, бегона эркакни раҳми келганидан уйига олиб киргани, уйида эркак бўлишини хоҳлаганини маълум қилган.
