Чўчқа гриппи Ўзбекистонга кириб келганми?

Ижтимоий тармоқларда чўчқа гриппи дунёнинг бир неча мамлакатларида қайд этилаётгани тўғрисидаги хабарлар тарқалмоқда.

Хўш, мамлакатимизда бу борада эпидемик вазият қандай? Ушбу касалликнинг юртимиз ҳудудига кириб келмаслиги учун қандай чора-тадбирлар амалга ошириляпти?

Санитария эпидемиологик осойишталик ва жамоат саломатлиги хизмати матбуот хизматига кўра, республикамизда чўчқа гриппи касаллиги аниқланмаган. Эпидемик вазият эса барқарор. Республикамиз ҳудудига четдан чўчқа гриппи касаллиги кириб келган тақдирда ҳам ўчоқни қамраб олиш (локализация) ва тугатиш (ликвидация) бўйича барча чора-тадбирлар бошқа ўткир респиратор касалликларида қандай ўтказилса, чўчқа гриппида ҳам худди шундай тадбирлар амалга оширилади.

Одатда чўчқа гриппи касалланган чўчқалардан юқади. Баъзи ҳоллардагина одамдан одамга юқади.

Одамлар орасида чўчқа гриппи инфекциясининг одатдаги клиник кўриниши мавсумий грипп ва бошқа ўткир юқори нафас йўлларининг инфекцияларига ўхшаш бўлиб, ҳароратнинг кўтарилиши ва нафас олиш тизимида яллиғланиш, йўтал, ангина, фарингит, буруннинг битиши каби белгилар пайдо бўлади.

Касаллик фақат махсус лаборатор текшириш усуллари билан тасдиқланади.

Чўчқа гриппига чалинган (гумон қилинган) беморлар дарҳол юқумли касалликлар касалхонасида махсус ташкил этилган госпиталга, гумон қилинганлар бўлса, улар провизор госпиталга, мулоқотда бўлганлар эса изоляторга ётқизилади. Бемор тўлиқ тузалгунча даволанади, алоҳидаланиб (изоляция), тиббий кузатув остига олинади.

Шифокорлар агар яқинда чет давлатдан қайтиб, соғлиғида безовталик сезган инсонларга дарҳол шифокорга мурожаат қилишни тавсия этади.