«Челси»нинг собиқ хўжайини Роман Абрамович солиқ тўлашдан бўйин товлашда гумон қилинмоқда

Лондоннинг «Челси» клуби собиқ эгаси, россиялик миллиардер Роман Абрамович солиқ тўлашдан бўйин товлаш билан боғлиқ эҳтимолий молиявий қоидабузарликларда гумон қилинмоқда. Бу ҳақда BBC нашри журналистик суриштирув натижаларига таяниб хабар берди.

Маълум қилинишича, мазкур операцияларда Deloitte аудиторлик компанияси ҳамда корпоратив хизматлар кўрсатувчи MeritServus фирмаси иштирок этган бўлиши мумкин.

Минглаб махфий ҳужжатларнинг тарқалиши асосида ўтказилган суриштирувга кўра, 2006 йилда Amiscan Investments компаниясига тегишли қатор қимматбаҳо активлар Британия Виргин оролларида рўйхатдан ўтган бош компанияга ўтказилган.

Улар орасида Ғарбий Суссексдаги ҳашаматли уй, Лондондаги квартира, Франция жанубидаги мулк, хусусий самолётлар, вертолётлар ва Pelorus яхтаси бўлган.

Журналистларнинг аниқлашича, ушбу операцияларга оид ҳужжатлар 2006 йилда расмийлаштирилган бўлса-да, уларда 2003 йил санаси кўрсатилган.

Deloitte Cyprus мазкур ҳужжатларни текшириб, компаниянинг молиявий ҳисоботини тасдиқлаган. Натижада умумий қиймати 672 миллион долларга тенг активлар ҳисоботдан чиқариб ташлангани айтилмоқда.

Суриштирувда Абрамовичга алоқадор бошқа компаниялар фаолияти ҳам ўрганилган.

Хусусан, Kravin Investments компаниясининг Кипрдаги ҳисобварақларида қарийб 2 миллиард доллар сақлангани, Electus Investments эса миллиардернинг 10 миллиард доллардан ортиқ бизнес активларини бошқаргани қайд этилган.

Журналистлар маълумотига кўра, ушбу компаниялар учун ҳам санаси ўзгартирилган ҳужжатлар тайёрланган бўлиши мумкин. Бундай операциялардан кўзланган мақсад Кипрда фоизли даромадларга солинадиган солиқдан қочиш бўлгани тахмин қилинмоқда.

Ҳозирда Туркияда яшаётгани тахмин қилинаётган Абрамович Жерси оролида олиб борилаётган жиноий суриштирувда ҳам фигурант ҳисобланади. Мазкур ҳудудда унинг 5,4 миллиард фунт стерлинг ёки тахминан 7,1 миллиард долларлик активлари музлатилган.

Бироқ миллиардернинг адвокатлари унга нисбатан илгари сурилган айбловларни рад этмоқда.

Ҳуқуқшуносларнинг таъкидлашича, Абрамович компанияларнинг кундалик бошқарувида бевосита иштирок этмаган ва ҳужжатларни сохталаштиришга ҳеч қандай рухсат бермаган.

Ўз навбатида, Deloitte Cyprus компанияси барча фаолиятини амалдаги қонунчиликка мувофиқ олиб боришини билдирган.

Компания вакиллари ҳужжатлар 20 йилдан кўпроқ вақт аввалги даврга тегишли экани ва ҳозирда улардан фойдаланиш имконияти йўқлигини таъкидлаб, суриштирув тафсилотларига изоҳ беришдан бош тортган.

Эслатиб ўтамиз, Роман Абрамович 2003–2022 йиллар давомида «Челси» клубига эгалик қилган.

Унинг раҳбарлиги даврида лондонликлар беш марта Англия Премьер-лигаси чемпиони бўлган ва икки бор УЕФА Чемпионлар лигасида ғолиб чиққан.

2022 йилда жорий этилган санкциялар ортидан Абрамович «Челси»ни сотишга мажбур бўлган.