Буюк Британия ташқи ишлар вазири Украинага ташриф буюради

Буюк Британия ташқи ишлар вазири Жеймс Клеверли жума куни Украинага ташриф буюради ва бу сафар Киевга қиш олдидан қўшимча ёрдам сифатида миллионлаб фунт стерлинг ажратилишини эълон қилади, дея хабар берди Британия Ташқи ишлар вазирлиги.

Лондон Украинанинг муҳим инфратузилмасини тиклашга ёрдам бериш учун 3 миллион фунт стерлинг ва очарчилик таҳдиди остида қолган мамлакатларга дон етказиш учун Киев ташаббусига яна 5 миллион фунт ажратиши кутилмоқда.

"Буюк Британия Украина билан доим елкама-елка туради", — деди Клеверли баёнотида. "Буюк Британиянинг саъй-ҳаракатлари Украинанинг жасур фуқароларига қаршилик кўрсатиш ва мамлакатни қайта тиклашда қандай ёрдам бераётганини ўз кўзим билан кўрмоқдаман. Бундай ажойиб мамлакатни қайта тиклаш учун қанча вақт ёрдамимиз керак бўлса, шунча давом этади".

Сафар давомида ТИВ раҳбари Украина президенти Володимир Зеленский ва ташқи ишлар вазири Дмитро Кулеба билан учрашади.

Клеверли Буюк Британия Бош вазири Риши Сунакнинг Украинага ташрифидан кўп ўтмай, Киевга бормоқда. У сафар давомида Киевга ўзидан олдинги раҳбарлар уруш бошланганидан бери кўрсатган ёрдамни давом эттиришга ваъда берди.