Боғча, цех, Colorpark – "Алоқабанк" ОАВ ходимлари учун пресс-тур уюштирди (ФОТОГАЛЕРЕЯ)

Жорий йилнинг 12 август куни "Алоқабанк" томонидан ОАВ ходимлари учун пресс-тур уюштирилди. "Республика ҳудудларида тадбиркорлик инфратузилмасини ривожлантириш" мавзусига бағишланган пресс-тур давомида "Kinder land of Asia" боғчаси, "Mehnat baxtli sut" МЧЖ колбаса цехи, "Dilbar uchterak savdo" боғчаси ва "Colorpark" типографияси фаолияти билан танишдик.

Пресс-тур "Kinder land of Asia" боғчасидан бошланди.

Мазкур боғчада тарбияланувчилар учун 180 ўрин ажратилган.

"Ҳозирча боғчага 1,5 ёшдан 7 ёшгача бўлган 70 та болани қабул қилдик, – дейди боғча мудираси Феруза Қодирова. – Боғчада ҳам рус, ҳам ўзбек гуруҳлари ташкил қилинган. Фарзандлари учун айнан бизнинг муассасани танлаётган ота-оналардан хурсандмиз. Уларнинг кўпи бизни ижтимоий тармоқдаги саҳифаларимиз орқали кўрган ва нархи қулайлигини таъкидлашмоқда".

Маълумот учун, боғчада бир бола учун тўлов 2 300 минг сўмни ташкил қилади. Боғчадаги ҳар бир хона тарбияланувчининг ёшига, қабул қила олишига қараб жиҳозлар ва болалар учун махсус буюмлар билан тўлдирилган. Хатто уларни кичиклигидан касбга йўналтириш учун махсуслаштирилган хоналар ҳам бор. Хоналардаги ҳар бир деталга эътибор қаратилган. Масалан, кичик ўйинчоқлар орқали болаларда майда қўл маторикаси ривожланади. Бу эса мия фаолиятига яхши таъсир ўтказади.

Муассасада кўп спорт тўгараклари, жумладан, таэквондо, гимнастика ва сузиш машғулотлари бор. Бундан ташқари, тил тўгараклари ҳам мавжуд. Aйни вақтда 22 та ходим фаолият юритмоқда. Педагоклар ҳам, психолог ва тарбиячилар ҳам олий-маълумотли, ўз касбининг мутахассиси. Ошпазлар маҳоратли ва тажрибага эга. Тренер ҳам спорт устаси.

"Биз болалар келажаги учун яхши мутахассисларни ишга олганмиз деб айта оламиз, – деди Феруза Қодирова. – Болалар боғча ва мактабга суҳбат асосида қабул қилиняпти. Суҳбатга психолог жалб қилинаётган бўлса, педиатор ва ҳамшираларимиз қабулга келган ҳар бир болани соғлигини текшириб олмоқда".

Бир сўз билан айтганда, бу боғчада ҳамма шароит етарли.

"Mehnat baxtli sut" колбаса цехида айни дамда замонавий технологиялар асосида фаолият олиб борилмоқда.

Энг муҳими, бу ерда сифатли маҳсулотлардан фойдаланилади. Меҳнат шароити тўлиқ муҳофазаланган.

Ушбу колбаса цехида 157 киши иш билан таъминланган.

"Dilbar uchterak savdo" боғчасида ҳозирда 350 нафар бола тарбияланмоқда. Бу ерда тарбияланувчилар турли тўгаракларда иштирок этишади.

Ёшликда олинган билим тошга ўйилган нақшдир деб бежиз айтишмаган. Шу боис ҳам боғчадаёқ болаларга сифатли таълим беришга эътибор қаратилмоқда.

Бундан ташқари, боғчада болаларнинг саломатлигига фойдали бўлган бошқа турли машғулотлар ҳам бор.

Айни дамда боғчада 65 нафар ходим болаларга бор меҳрини, эътиборини бериб келмоқда.

“Colorpark” МЧЖда айни дамда ҳар томонлама талабга жавоб берадиган китоблар чиқарилмоқда. 330 кишини иш билан таъминлаган ушбу типография чет элдан, хусусан, Германиядан келтирилган замонавий ускуналар билан жиҳозланган.

2003–2010 йиллар давомида ушбу корхона дунёнинг кўплаб йетакчи матбаа компаниялари билан алоқалар ўрнатди. Хорижнинг илғор технологиялари, жумладан, босма ускуналар, босма машиналар, сифат назорати станцияси, босма ускуналар тўплами харид қилинди. Буларга қўшимча равишда сўнгги 3 йил ичида компания Европанинг материаллар ва эҳтиёт қисмлар етказиб берувчиларидан, хусусан, Германия компанияларидан 8 миллион евродан ортиқ ускуна харид қилди. Шуниси қувонарлики, ушбу корхонанинг очилиши натижасида юздан ортиқ янги иш ўринлари яратилди.

Таъкидлаш жоизки, матбаа соҳасида кўплаб синовларни енгиб келаётган “Colorpark” масъулияти чекланган жамиятига 2003 йилда асос солинган, 15 млн евро миқдорида инвестиция киритиш ҳисобига замонавий полиграфия соҳаси ташкил этилган. 50 млрд сўм инвестиция киритиш ҳисобига эса бино ва объектлар қурилиб ободонлаштирилган.

Шу кунларда “Colorpark” ва “Ўқитувчи” босмахоналари негизида ташкил етилган матбаа мажмуаси сифатли, самарали офсет ва рақамли босиб чиқариш хизматларини кўрсатиб келмоқда. Босмахонада Марказий Осиё минтақасида тенгсиз ноёб замонавий матбаа ускуналари тўплами мавжуд.

Мажмуани бир ҳудудда ташкил этишдан асосий мақсад замонавий ёндашувлар асосида йилига 40 миллион нусхадан ортиқ сифатли китоб ва журнал маҳсулотларини ишлаб чиқариш имкониятини яратиш ва, албатта, замонавий стандартларга жавоб берадиган сифатли дарсликлар ва услубий қўлланмалар тайёрлашдир.