Asiana Airlines йўловчиси Жанубий Кореяга қўнишдан олдин самолёт эшигини очиб юборди

Asiana Airlines йўловчиси Жанубий Кореянинг Тегу аэропортига қўнишдан олдин самолёт эшигини очиб юборди. Бу ҳақда "Рёнхап" агентлиги хабар берди.

Қайд этилишича, самолёт эшиги 250 м баландликда очилган.

Ичида 194 киши бўлган самолёт шу ҳолатда қўнишга мажбур бўлган. Қўниш муваффақиятли ўтди, бироқ вазиятнинг шоклиги туфайли йўловчиларнинг бир қисми нафас олишида муаммоларга дуч келди. Тўққиз киши шифохонага етказилган.

Авиакомпания маълумотларига кўра, воқеа фавқулодда чиқиш жойи ёнида ўтирган 33 ёшли эркак эшикдаги авария ушлагичини тортиб олганидан кейин содир бўлган.

Полиция вазиятни текширмоқда. Маҳаллий ҳокимият вакилларининг сўзларига кўра, эркак қилмишининг сабаблари ҳақида гапирмаган ва “у билан оддий суҳбатлашиш қийин”. Шунингдек, у маст бўлмагани ҳам кўрсатилган.