Artel компанияси раҳбари: “Ёшлар Оксана Чусовитинанинг ҳаёти ва фаолиятидан мотивация олиш керак”

2021 йилнинг 11 август куни Artel, AKFA Group, Texnopark компанияларининг Visitor Center (кўргазмалар зали)да Токиодаги Олимпияда ўйинларида иштирок этган бир гуруҳ спортчилар билан учрашув ташкил этилди.

Мазкур учрашув спортчиларимизнинг қаҳрамонликларини эътироф этиш, уларни ёшларга ибрат қилиб кўрсатиш учун ташкил этилди. Учрашувнинг Artel, AKFA Group, Texnopark компаниялари ҳамкорлигида ташкил этилган янги кўргазмалар залида ўтказилишида ҳам рамзий маъно бор. Чунки, бу ерда ўзбек бренди остида чиқарилган маҳсулотларнинг кўргазмаси ташкил этилган. Бугун ушбу маҳсулотлар орқали компанияларимиз дунё бозорининг ўзига хос шоҳсупасини забт этиш йўлидан бормоқда.

• Баъзи спортчиларимизга маълум сабабларга кўра Олимпияда ўйинларида медал олиш насиб этмади. Artel ва AKFA Group компаниялари айнан ўша спортчиларни ҳам чақириб рағбатлантириши мени қувонтирди. Негаки, спортчига билдирилган ишонч унинг олға интилишида катта куч беради, дейди 32-ёзги Олимпияда ўйинларининг олтин медали соҳиби Баҳодир Жалолов.

Таъкидлаш керак, Artel ва AKFA Group компаниялари доим спорт мусобақаларига ҳомийлик қилиб келади. Жумладан, Artel компанияси шу йилнинг апрел ойида катталар ва май ойида ёшлар ўртасида оғир атлетика бўйича Осиё ва Жаҳон чемпионатларига ҳомийлик қилган эди. Ўз навбатида AKFA Group компанияси 2021 йилнинг январ ва май ойларида “Men G’olib” ҳарбий-ватанпарварлик мусобақаларига ҳомийлик қилган эди.

Олимпия ўйинларида муносиб иштирок этган ва ўзининг спортдаги фаолияти билан халқимиз қалбидан жой олган Олимпиядачиларимиз билан бўлган учрашувда компаниялар раҳбарлари Шоҳруҳ Рўзиқулов ва Камрон Ғуломовлар уларни қўллаб-қувватлашга доим тайёр эканини билдирди.

Жумладан, Artel компаниясининг бошқарув раиси Шоҳруҳ Рўзиқулов:

— Афсонавий спортчимиз Оксана Чусовитинанинг матонатли чиқишларини эслаб ўтиш шарт. Негаки, айнан Оксана Чусовитина спортчиларимизнинг қандай куч-қудратга эга экани, уларнинг жасорати ва матонатининг яққол мисолидир.

Олимпиада ўйинлари тарихида саккизинчи бор иштирок этиб, рекордини янгилаган спортчимиз ҳаётида ҳам, спорт майдонида ҳам доим баланд тўсиқлардан сакраб ўтишни санъат даражасида бизга намойиш этиб келди. Агар мендан ёшлар мотивацияни кимдан ва қаердан ўрганиши керак деб сўрашса, Оксана Чусовитинанинг ҳаёти ҳамда фаолияти билан танишиб чиқишни маслаҳат берган бўлардим, — дея айтиб ўтди.

Шунингдек, учрашувда дунёнинг энг кучли спортчилари қатнашган мусобақада етакчи ўринларни қўлга киритиб, мамлакат шарафини муносиб ҳимоя қилиш — ҳақиқий қаҳрамонлик, экани таъкидланди.

— Олимпия ўйинлари энг яхши спортчилар учун улкан мусобақалар байрами ҳисобланади. Токиодаги каби мусобақалар узоқ вақт инсонлар ёдидан чиқмайди. Уларга тайёргарлик нафақат пандемия туфайли ноаниқ режимда ўтказилди. Бунинг оқибатида спортчилар энг кучли мотивация берадиган мухлислар олқишидан бебаҳра қолди. Улар бўш трибуналар олдида беллашишга мажбур эди. Бу жиҳатдан ҳам ушбу мусобақа аввалгиларидан тубдан фарқ қилгани шубҳасиз, — деди AKFA Group компанияси бош директори Камран Ғуломов. — Сиз дунёнинг энг яхши спортчиси мақоми учун шараф билан курашдингиз ва Токиодаги Олимпия ўйинларида Ўзбекистон Республикасини муносиб ҳимоя қилдингиз. Кўплаб спортчилар Олимпия чемпиони унвонини орзу қилади. Биз спортчиларимиз бу номга муносиблар қаторидан жой олганидан хурсандмиз.

Қолаверса, Миразиз Мирзахалилов ва Турсуной Раҳимовалар ҳам олтин медалга муносиб экани айтилди. Сабина Тошкенбоева маълум сабаб туфайли мусобақаларда қатнаша олмади. Мазкур учрашувда эса унинг онаси иштирок этиб, компаниялар раҳбариятига кўрсатилган эътибор учун миннатдорлик билдирди.

Учрашув сўнгида иштирокчилар спортчилар шарафига ёзилган байрамона дастурхон атрофида самимий суҳбат қурди. Унда спортчилар эришган ютуқлари, Олимпиада ўйинлари йўлланмасини қўлга киритгунча бўлган машаққатли йўли, мусобақалардан олган таассуротлари ҳақида сўзлаб берди.

Эслатиб ўтамиз, шу йилнинг август ойида Artel ва AKFA Group компаниялар Тошкентда илк бор Visitors Center очган эди. У ўзига хос технология маркази бўлиб, ташриф буюрувчилар бир жойнинг ўзида компанияларнинг фаолияти билан интерактив форматда танишиши мумкин. Айтиш керак, бу Марказий Осиёдаги йирик кўргазмалар залларидан бири ҳисобланади.