АҚШ Украинанинг Россияга зарба беришига «йўл қўймайди» ёки «рағбатлантирмайди» - Давлат департаменти

АҚШ Давлат департаменти Америка Украинани Россия ҳудудига зарба беришга «йўл қўймайди» ва «рағбатлантирмайди» деб ишонтирмоқда.

Давлат департаменти матбуот котиби Нед Прайс Россия Украинани унинг ҳарбий инфратузилмасига ҳужум қилишда айблаганидан сўнг, «Биз Украинани суверен ҳудудида, Украина тупроғида, унинг чегараларини кесиб ўтган рус тажовузкорларига қарши фойдаланиши учун зарур бўлган ҳамма нарса билан таъминлаймиз», деди.

Прайс, шунингдек, Қўшма Штатлар Украинага ўз мамлакатидан ташқарида фойдаланиши мумкин бўлган қуролларни бермаслигини таъкидлади. «Биз ҳар доим бу мудофаа қуроллари эканлигини аниқ айтиб келганмиз», деди у.

Шу билан бирга, АҚШ Давлат департаментига кўра, кечаги Россиянинг иккита ҳарбий ҳаво базасига қилинган ҳужумлар катта эҳтимол билан Украина томонидан уюштирилган.

АҚШ Давлат котиби ёрдамчиси Виктория Нуланд таъкидлаганидек, ҳеч ким дрон ҳужумлари учун жавобгарликни ўз зиммасига олмади, бироқ «мақсадлар Россия асосий инфратузилмага зарба бериш учун фойдаланадиган бомбардимончилар эди».

«Аввал айтганимдек, украиналиклар ниҳоятда зукко», - дейди Киев сафаридан қайтган Нуланд. «Улар ўзларининг технологиялари ва жиҳозлари устида қаттиқ ишлайдилар.»

Шу билан бирга, Давлат департаменти вакили яна бир бор Американинг Украинани Россия ҳудуди тубида зарба беришга қодир қуроллар билан таъминлашдан бош тортиш сиёсати ўзгаришсиз қолаётганини эслатди.