Андижонда деярли 4,5 млрд. сўм турувчи бино сотувга қўйилди

Олтинкўл тумани давлат солиқ инспекцияси қарорида акс этишича, “А.Ч.” МЧЖнинг 9 турдаги солиқ тўловларидан қарздорлиги йиғилиб қолган. Булардан энг йириги айланма солиқ қарзлари ҳиссасига тўғри келади. Унинг миқдори 1,6 млрд. сўмни ташкил этса, тўланмаган мол-мулк солиғи 477 млн. сўмга бориб етган. Бундан ташқари, жамият солиқ қонунчилигини бузганлиги учун тортилган 251 млн. сўм молиявий жарималарни ҳам тўламаган.

Солиқ қарздорликлари йиғилиб, қарздор жамият давлат бюджетига жами 2,5 млрд. сўмни тўлаши бўйича 26.04.2022 йилда қарор чиқарилган.

Мажбурий ижро бюроси Олтинкўл туман бўлими ходимлари ижро ҳаракатлари олиб бориб, қарздор жамият вакилларини бир неча маротаба огоҳлантирган. Бироқ, қарздор 2,5 млрд. сўм солиқ қарзидан 20 млн. сўмнигина тўлаган холос. Қолган қарздорлик қопланмаган.

Натижада, қарздорга тегишли Олтинкўл тумани, Катта Оқтепа МФЙда жойлашган 40 440 кв.м ер майдонига эга ишлаб чиқариш бино-иншоотлари хатлаб қўйилган. Шундан сўнг ҳам қарздорлик қопланмагач, мулк сотувга чиқарилди. Энг ачинарлиси, бинонинг бошланғич нархи 4,3 млрд. сўмдан зиёдни ташкил этади.

Шундай қиммат нархдаги ишлаб чиқариш биноси “e-auksion” савдо платформасига сотиш учун жойлаштирилган.
Ҳозирда ижро ҳаракатлари давом этмоқда.