Абдулазиз Комилов Ватиканда архиепископ билан учрашди
11 декабрь куни бугун Рим шаҳрига келган Ўзбекистон ташқи ишлар вазири Абдулазиз Комилов Ватиканнинг давлатлар билан муносабатлар бўйича котиби, архиепископ Пол Ричард Галлахер билан учрашди. Бу ҳақда вазирлик матбуот хизмати хабар берди.
Ташқи сиёсат идоралари раҳбарлари Ўзбекистон ва Ватикан ўртасидаги ҳамкорликка оид қатор масалаларни муҳокама қилди.
1992 йил октябрь ойида бошланган икки томонлама муносабатларнинг динамик кўриниши мамнуният билан қайд этилди. Таъкидланганидек, Ўзбекистондаги миллатлараро тотувлик ва диний бағрикенглик, биргаликда жамланган ҳамкорлик тажрибаси давлатлараро алоқаларни сифат жиҳатдан янги босқичга кўтаришда муҳим омил бўлиб хизмат қилади.
Давлат раҳбарларининг мулоқоти ва бошқа даражадаги доимий алоқалар Ўзбекистон ва Ватикан ўртасидаги ҳамкорликни янада ривожлантиришнинг истиқболли йўналишларини белгилаш ва уларга эътибор қаратиш имконини бериши таъкидланди.
Суҳбат чоғида икки томонлама ва кун тартибидаги бошқа масалалар ҳам кўриб чиқилди.
