20 долларлик банкнотада афроамерикалик Гарриет Табменнинг тасвири пайдо бўлади

АҚШ молия вазирлиги XIX асрда қулларнинг озод қилиниши ҳаракати фаолларидан бири, афроамерикалик Гарриет Табменнинг тасвири тушириладиган 20 долларлик купюранинг чиқарилишини тезлаштиришга қарор қилди. Бу ҳақда Оқ уй матбуот котиби Жен Псаки маълум қилди. 

Унинг айтишича, АҚШ банкноталари мамлакатнинг тарихи ва турфа хиллигини акс эттириши муҳим ҳисобланади. Шу сабабли молия вазирлиги юқоридаги масала бўйича ишни тезлатиш имкониятини ўрганмоқда.

Дастлаб Табменнинг суратини 20 долларлик купюрада жойлаштириш қарори АҚШнинг собиқ президенти Барак Обама маъмурияти томонидан қабул қилинган.

Бироқ Обамадан кейинги президент Дональд Трамп вақтида ушбу қарорнинг амалга оширилиши 2028 йилга қолдирилганди. Трамп таъкидлаганидек, у ҳозирда 20 долларликда тасвирланган 7-президент Эндрю Жексонни жуда ҳурмат қилади.

Трамп 2020 йил 4 июлда АҚШ мустақиллиги куни муносабати билан сўзлаган нутқида ўз талқини бўйича буюк америкаликлар рўйхатини эълон қилганди. Собиқ президент бу рўйхатга АҚШнинг асосчи-оталари, уруш қаҳрамонлари, афроамерикаликлар ҳуқуқлари учун курашчилар, авиаторларни киритган. Трампнинг ушбу рўйхатига Гарриет Табмен афроамерикаликлар ҳуқуқлари курашчиси сифатида киритилган.

Гарриет Табмен (қизликдаги исми Араминта Росс) АҚШда қулдорликнинг бекор қилиниши ва ислоҳотлар курашчиси ҳисобланиб, юзлаб афроамерикаликларни қулликдан қутқарган. У ҳақида кўплаб китоблар ёзилган ва фильмлар ишланган.