Хитойда тарихдаги энг катта хакерлик ҳужуми содир этилди
Шанхай полиция базасидан миллиардлаб хитойликка оид маълумотлар ўғирланган.
Bloomberg нашри хабарига кўра, бир ёки бир неча гуруҳ хакерлар Шанхай полициясининг маълумотлар базасига бузиб киришган ва Хитойдаги миллиардга яқин кишининг маълумотларини кўчириб олган. Бу мамлакат тарихидаги энг йирик маълумотлар ўғирланиши ҳисобланади.
Хакерлик ҳақидаги хабар ўтган ҳафта даркнетдаги онлайн форумлардан бирида эълон қилинган. 4 июль куни Binance криптовалюта биржасининг бош директори Чжао Чангпенг Twitter'да воқеа ҳақида тўлиқроқ маълум қилди.
Унинг сўзларига кўра, компания Осиё мамлакатининг миллиардга яқин фуқароси ҳақидаги маълумотларнинг сизиб чиқишини қайд этган. Хакерлар исмлар, манзиллар, туғилган жойлар, телефон рақамлари, паспорт рақамлари, шунингдек, жиноий ҳуқуқбузарликлар ҳақидаги маълумотларни олишга муваффақ бўлишган. Хакерлар ихтиёрида 23 ТБ ҳажмли маълумотлар базаси мавжуд. Маълумотларни қайтариш учун ўғрилар 10 биткоин сўрамоқда, бу бугунги курс бўйича тахминан 200 000 минг долларни ташкил этади. Шанхай расмийлари ҳозирча хакерлик ҳолатига изоҳ бермаган.
Хакерлар Шанхай полицияси серверларига қандай қилиб киришгани номаълум. АҚШ ва бошқа давлатлар бир неча бор Хитойни кибержиноятчиларнинг дунёдаги энг йирик манбаларидан бири деб атаган. Мутахассисларга кўра, хакерлар қимматли маълумотлар ёки интеллектуал мулкларга ҳужум қилиш учун маҳаллий идоралар номидан тизимларга кириб боришади.
