“Ватанпарвар”да техник касблар тайёрлови бўйича илмий-амалий конференция ўтказилди

28 ноябрь куни “Ватанпарвар” ташкилоти Марказий кенгаши ташаббуси билан “Техник касб мутахассисларини тайёрлаш жараёнига замонавий ёндашувлар ва тенденциялар” мавзусида илмий-амалий конференция бўлиб ўтди.

Тадбирнинг асосий мақсади — фуқароларни меҳнат бозорида талаб юқори бўлган техник йўналишларга ўқитишда давлат ва жамоат ташкилотлари билан ҳамкорликни янада кучайтириш ҳамда ўқув жараёни самарадорлигини оширишга қаратилган қўшимча чора-тадбирларни белгилашдан иборат.

“Ватанпарвар”нинг 34 йиллиги муносабати билан ташкил этилган конференцияда Миграция агентлиги, Ёшлар ишлари агентлиги, ИИВ ЙҲХ хизмати, “GM O‘zbekiston”, “SAMIST AUTO”, “Swift Road Academy” каби қатор ташкилотлар вакиллари иштирок этди. Маърузачилар ёшларни касбга тайёрлаш борасидаги ишлар ҳақида маълумот бериб, ҳамкорликни кенгайтиришга оид таклифларни илгари сурдилар.

Ташкилот тизимида ҳайдовчилар тайёрлаш билан бирга меҳнат бозорида талаб юқори бўлган 10 та қўшимча касб бўйича ўқитиш механизми йўлга қўйилди. Жумладан:

Техник хизмат кўрсатиш мутахассислари: вулканизатор, газ-электр пайвандчи, авточилангар, автоэлектрик.

Мураккаб техникалар операторлари: юк ортувчи транспорт, автогидроподъёмник, юк машинаси крани, ғилдиракли трактор, битта ковшли экскаватор.

Ёшлар ва аҳолининг эҳтиёжманд қатламларини қўллаб-қувватлаш мақсадида “Ёшлар дафтари”, “Темир дафтар”, “Аёллар дафтари”даги фуқароларни техник касбларга имтиёзли ўқитиш йўлга қўйилган.

Ҳар йили 100–150 минг нафар фуқаро ҳайдовчиликка ўқитилмоқда.

Ўқув марказларида:

2 000 дан ортиқ ўқув автомобилларига GPS,

кириш жойларига Face-ID қурилмалари ўрнатилди ва тизимлар Ягона ахборот базасига интеграция қилинди.

2023 йил 396-сон қарор асосида ўқув автомобилларини янгилаш жараёни йўлга қўйилиб, 3 000 машинанинг 1 000 таси замонавий русумларга алмаштирилди. “GM O‘zbekiston” билан ҳамкорликда 500 дан ортиқ “ONIX LS MT” ва 8 та “Tracker-2”, “SAMIST AUTO” билан 100 дан ортиқ “FOTON” русумли юк автомобиллари харид қилинди.

Қорақалпоғистон ва вилоятларда жами 25 та замонавий автодром барпо этилди. Яна 3 та ҳудудда қўшимча автодромлар қурилмоқда.

2023 йилда “Ватанпарвар” ва Миграция агентлиги ўртасида Меморандум имзоланиб, хорижий меҳнат бозори учун техник мутахассислар тайёрлаш йўлга қўйилди.

Бу доирада:

2024 йилда — 27 нафар,

2025 йилда — 85 нафар фуқаро “ВС” ва “СЕ” тоифалари бўйича тайёрланиб Германияга ишга юборилди.

Шунингдек, Латвия, Япония, Жанубий Корея, Италия ва Словения делегациялари ташриф буюриб, ўз талабларига мос ҳайдовчилар тайёрлаш бўйича ҳамкорликни йўлга қўйди.

“СЕ” тоифаси бўйича:

26 нафар — Литва,

25 нафар — Чехия,

31 нафар — Польша,

30 нафар — Болгария

талабларига мос мутахассислар тайёрланди.

Франциянинг “Pejo” автомобил заводи учун 300 нафар юк ортиш транспорти операторлари тайёрланди.

Спорт йўналишлари ҳам ривожланмоқда

Тадбир доирасида автокросс, мотокросс, картинг, дуатлон ва пневматик қуролдан ўқ отиш бўйича ташкил этилган техник-амалий спорт тўгараклари намойиш этилди.