Ўзбекистоннинг энг қиммат олий ўқув юртлари эълон қилинди

Давлат тест маркази Ўзбекистондаги энг қиммат олий ўқув юртларини эълон қилди.

Юртимиздаги энг қиммат олий ўқув юртлари рўйхатига 9 та хорижий университет филиаллари ва 1 та хусусий университет киритилган.

Энг қиммат университет сифатида AKFA университети тан олинди. Унда 1 йиллик ўқиш нархи 58 миллион сўмни (6084 АҚШ доллари) ташкил этади.

AKFA университети Вазирлар Маҳкамасининг 2019 йил 15 феврал қабул қилинган қарорига биноан ташкил этилган. Олий таълим муассасаси фундаментал, тиббий, аниқ ва гумантар фанлар бўйича юқори малакали мутахассисларни тайёрлайди. Таълим жараёни инглиз тилида олиб борилади ва 6 йил давом этади (2 йил тайёрлов курслари ва 4 йил тиббиёт факултетида).

Москва давлат Халқаро муносабатлар институтининг Ўзбекистондаги филиалида (МГИМО) 1 йиллик ўқиш нархи 52 230 000 сўмни (5479 АҚШ доллари) ташкил этмоқда.

МГИМО жорий йилнинг сентябрь ойидан талабаларни “Бизнес-ахборот” ҳамда “Юриспуриденция” йўналишларида ўқитишни бошлаган. Россиянинг нуфузли университети дунёнинг энг нуфузли университетлари рўйхатида 366 ўринда турибди.

Тошкент шаҳридаги Inha университетида 1 йиллик ўқиш нархи 30 000 000 сўмни (3147 АҚШ доллари) ташкил этмоқда.

Тошкент шаҳридаги Инҳа университети Ўзбекистон Республикаси Президентининг 2014 йил 24 мартдаги ПҚ-2155-сонли «Тошкент шаҳрида Инҳа университетини ташкил этиш» тўғрисидаги қарорига биноан ташкил этилиб, 2014 йил 2 октябрдан “Компьютер инжиниринги” ва “Дастурий инжиниринг” йўналишлари бўйича ўз фаолиятини бошлаган.

Тошкентдаги Вебминстер халқаро университетида (WIUT) 1 йиллик ўқиш нархи 30 000 000 сўмни (3147 АҚШ доллари) ташкил этмоқда.

Тошкентдаги Вебминстер халқаро университети (WIUT) Марказий Осиёдаги Буюк Британия таълим сифати бўйича ўқитиладиган илк университетдир. 2002 йилнинг январ ойидан фаолиятни бошлаган.

Тошкент шаҳридаги Сингапур менежментни ривожлантириш институтида (MDIS Tashkent) 1 йиллик ўқиш нархи 28 800 000 сўмни (3021 АҚШ доллари) ташкил этмоқда.

Тошкент шаҳридаги Сингапур менежментни ривожлантириш институти Ўзбекистон Республикаси Президентининг 2007 йил 5 сентябрдаги қабул қилинган ПҚ-691-сонли қарорига мувофиқ ташкил этилган. Интитут Ўзбекистон ва бошқа МДҲ мамлакатлари фуқаролари учун Тадбиркорлик ва менежмент, Бизнес ва маркетинг, Банк ва молия, Бухгалтерия ва молия, Бизнесда ҳисоб-китоб, Халқаро меҳмондўстликни бошқариш соҳаларида академик дастурлар орқали Буюк Британия университетлари билан ҳамкорлик қилган ҳолда профессионал ривожланиш имкониятини яратмоқда.

Тошкент шаҳридаги Турин политехника университетида 1 йиллик ўқиш нархи 28 500 000 сўмни (2989 АҚШ доллари) ташкил этмоқда.

Университет 2009 йил 27 апрелда қабул қилинган Ўзбекистон Республикаси Президентининг “Тошкент шаҳридаги Турин политехника университети фаолиятини ташкил этиш тўғрисида”ги қарори билан ташкил этилган. Университетнинг стратегик ривожлантириш режасига асосан университет нафақат автомобилсозлик, балки қурилиш ва архитектура, энергетика ва ахборот технологиялари соҳалари учун кадрлар тайёрлайдиган таълим муассасасига айланиши назарда тутилган. “Машинасозлик технологияси”, “Авиакосмик инжиниринг”, ”Саноат қурилиш ва архитектура” ҳамда “Ахборот технологиялари ва саноатда АБТ” йўналишларида бакалавриат, “Машинасозлик технологияси” ва “Мехатроника” йўналишида магистратура мутахассисликлари мавжуд.

Тошкент шаҳридаги Пучон университетида (Bucheon University in Tashkent, BUT) 1 йиллик ўқиш нархи 28 250 000 сўмни (2963 АҚШ доллари) ташкил этмоқда.

Тошкентдаги Пучон университети Ўзбекистон Республикаси Президентининг 2018 йил 2 июлдаги 3821-сонли Фармонига асосан Олий ва ўрта махсус таълим вазирлиги, Ўзбекистон Республикаси Мактабгача таълим вазирлиги ва Пучон университети (Корея Республикаси) ташаббуси билан ташкил этилган. Унда гуманитар: бошқарув факултети, меҳмонхона бошқаруви, мактабгача таълим ва бошқалар; табиий фанлар: озиқ-овқат, ҳамширалик ва бошқалар; муҳандислик: архитектура факултети, ички дизайн, АКТ, ахборот хавфсизлиги ва бошқалар; санъат: Рақамли медиа дизайни факултети йўналишлари мавжуд.

Вебстер университети Тошкент филиали 1 йиллик ўқиш нархи 27 400 000 сўмни (2874 АҚШ доллари) ташкил этмоқда.

2019 йилнинг 1 ноябрь Вебстер университети (АҚШ)нинг Марказий Осиёдаги биринчи филиали - Тошкент шаҳридаги таълим дастурларини амалга ошириш Марказининг тантанали очилиш маросими бўлиб ўтди. Университетда ўқув жараёнлари 2019/2020 ўқув йилидан ўқув жараёнлари бошланди ва бу ерда бакалавриатнинг асосий 14 та таълим йўналишлари ҳамда 16 та магистратура мутахассисликларида кадрлар тайёрлаш йўлга қўйилди.

Тошкент шаҳридаги Yeoju техника институтида 1 йиллик ўқиш нархи 26 000 000 сўмни (2727 АҚШ доллари) ташкил этмоқда.

Институтда архитектура ва шаҳарсозлик, қурилиш, муқобил энергия, туризм, бизнесни бошқариш, халқаро маркетинг, халқаро ичтисодий муносабатлар, бошланғич таълим, мактабгача таълим, корейс филологияси, либослар дизайни йўналишлари мавжуд.

Amity университети Тошкент филиалида 1 йиллик ўқиш нархи 25 350 000 сўмни (2659 АҚШ доллари) ташкил этмоқда.

Amity университети Тошкент филиали олий таълимнинг ахборот технологиялари, менежмент ва туризм соҳаларида таълим беради.