Uzbekistan Airways Лондон, Франкфурт ва Рига шаҳарларига авиақатновлар сонини оширади
2023 йилнинг 26 мартидан бошлаб Uzbekistan Airways Тошкентдан Лондон, Франкфурт ва Рига шаҳарларига парвоз қилувчи авиақатновлар сонини оширмоқда. Бундан кўзланган мақсад йўловчиларга қўшимча қулайликлар яратиш, сайёҳлар оқимини кўпайтиришдир.
26 мартдан бошлаб Тошкент – Лондон – Тошкент йўналиши бўйича парвозлар сони ҳафтасига 2 мартадан 3 мартагача оширилади. Сешанба ва жума кунларидан ташқари, якшанба кунлари ҳам парвозлар бажарилади.
Uzbekistan Airways 29 мартдан бошлаб эса Тошкент – Франкфурт – Тошкент йўналиши бўйича парвозлар сонини ҳафтасига 3 мартадан 4 мартага кўпайтиради. Бундан буён Франкфуртга тўғридан-тўғри авиақатновлар душанба, чоршанба, пайшанба ва шанба кунлари амалга оширилади.
Шунингдек, 29 мартдан Тошкент – Рига – Тошкент йўналиши бўйича парвозлар сони ҳафтасига 3 мартагача оширилмоқда. Йўловчилар тўғридан-тўғри авиаташувларда душанба, чоршанба ва жума кунлари саёҳат қилишлари мумкин.
Шу билан бирга, Uzbekistan Airways ёзги парвозлар жадвалига ўтиши муносабати билан 28 мартдан Тошкент – Милан – Тошкент, 31 мартдан бошлаб эса Тошкент – Париж – Тошкент йўналишларида авиақатновларни йўлга қўяётганини маълум қилади.
Авиачипталарни авиакомпаниянинг расмий www.uzairways.com сайти орқали 3% чегирма билан, шунингдек, “UzAirways” мобил иловаси, Узбекистан Airways Sales орқали ёки авиакомпания агентларидан харид қилишингиз мумкин.
