Ўрмон хўжаликлари фаолиятига бағишланган семинар ўтказилмоқда

24-25 январь кунлари Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги томонидан 2025 йил – “Атроф-муҳитни асраш ва «яшил» иқтисодиёт йили” муносабати билан ўрмон хўжаликларини ривожлантириш, амалга оширилган ишлар ва истиқболдаги режалар муҳокамасига бағишланган амалий семинар ўтказилмоқда.

Тошкент вилоятининг Бўстонлиқ туманида ўтказилаётган семинарда Экология вазири Азиз Абдуҳакимов, Ўрмон хўжалиги агентлиги директори Эркин Муҳитдинов, Қорақалпоғистон Республикаси ва вилоятларда фаолият кўрсатаётган 79 та ҳудудий ўрмон хўжаликлари раҳбарлари, шунингдек, Жаҳон банки, БМТнинг озиқ-овқат ва қишлоқ хўжалиги ташкилоти (ФАО), КОИCА ва Суппро Лтд. компанияси вакиллари, мутахассис олимлар ҳамда ОАВ вакиллари иштирок этмоқда.

Семинарнинг очилиш маросимида нутқ сўзлаган Экология вазири Азиз Абдуҳакимов Президент ташаббуси билан ўрмонларни асраб қолиш борасида бир қанча ижобий ўзгаришлар юз бераётганини таъкидлади.

«Охирги йилларда давлатимиз раҳбари томонидан дарахтларни кесишга қарши назорат кучайтирилди, бунинг учун жавобгарлик оширилди, мораторий эълон қилинди. Юртдошларимиз дарахтни шунчаки кесиб бўлмаслигини, бу қонунан тақиқланганлигини ва қатъий жавобгарлик белгиланганини тушунишяпти», - деди вазир.

Шунингдек, А.Абдуҳакимов ўрмон хўжаликлари фаолиятига танқидий-таҳлилий ёндашиб, соҳада айрим камчиликлар, қонунбузарлик ҳолатлари сақланиб қолаётганлигини ва уларни бартараф этиш биринчи галдаги вазифа эканлигини таъкидлади.

«Бугун ерларнинг деградацияга учраши, ўрмонзорларнинг йўқолиши, чўлланиш бутун дунёда энг глобал экологик муаммога айланди. Мазкур муаммо, айниқса, Марказий Осиё минтақасига жуда катта салбий таъсир кўрсатмоқда. Ягона ечим эса ўрмонларни сақлаб қолиш ва уларни кўпайтиришдир. Шунинг учун барча ўрмон хўжаликларида ҳар қандай турдаги қонунбузарлик ҳолатларига чек қўйишимиз лозим. Агар бугун дарахтларни кесиш ҳолатларини бартараф этмасак, ўрмонларни асраб қололмасак, бу келажакда фожиали ҳолатларга олиб келиши муқаррар. Қолаверса, келажак авлод ҳам бизни кечирмайди», - деди вазир.

Шунингдек, вазир ўрмон хўжаликлари раҳбарлари билан мулоқот қилиб, уларнинг фикр ва таклифларини тинглади. Соҳада замонавий технологиялардан фойдаланиш, дарахт экиш ва кўчатларни парваришлаш ишлари, ўрмон хўжалигини самарали бошқариш масалалари муҳокама қилинди.

«Ўрмончилар учун бундай даражадаги семинар биринчи марта ўтказилмоқда. Соҳа ходимлари ўзаро фикр алмашишмоқда, муаммолар, камчиликларга биргаликда ечим изланмоқда, мутахассислар, олимлар ўз таклифларини билдиришмоқда. Яъни бу семинар фикр ва тажриба алмашиш, соҳа ходимларининг узилиб қолган алоқаларини, ҳамфикрлилигини қайта тиклашга имконият бермоқда. Қолаверса, 2025 йилда ўрмонзорларни кенгайтириш учун, ҳаммамиз учун бирдек манфаатли бўлган мақсадларни белгилаб оляпмиз. Бу семинар бизга жуда катта туртки берди», - деди Бухоро давлат ўрмон хўжалиги агентлиги директори Рустам Очилов.

Семинар давомида Ўрмон хўжалиги илмий-тадқиқот институти лаборатория мудири, қишлоқ хўжалиги фанлари доктори Зиновий Новицкий Оролда ўрмонларни ривожлантириш, туркиялик халқаро эксперт Аҳмад Ялвач эса ўрмонларни кўпайтиришда Туркия тажрибасига бағишланган тақдимотлар ўтказди.

Семинар давом этмоқда.