UNICEF: Ғазода болалар тўйиб овқатланмасликдан нобуд бўляпти

Қамалдаги Ғазо секторида болалар тўйиб овқатланмасликдан жон бермоқда. Бу ҳақда UNICEF ижрочи директори Кэтрин Рассел CBS телеканали “Face the Nation” дастурида айтиб ўтди.

Рассел қайд этишича, шу кунгача Фаластин анклавида 13 мингдан кўп бола ҳалок бўлган, минглаб бола жароҳатланган, вайрона остида қолган ёки ота-онасидан айрилган.

– Болалар ўлимининг бундай даражаси дунё бўйлаб ҳеч қайси бошқа можароларда кузатилмаган, – деди у. – Бу ҳақиқатан жуда аянчли вазият. Ғазода содир бўлаётган воқеалар туфайли пайдо бўлган, болаларга чуқур таъсир қилаётган қайғу ва қўрқувни улар умрининг охиригача ҳис қиладилар.

Рассел Ғазога ҳаводан туширилган ва денгиз орқали юборилган инсонпарварлик ёрдами етарли эмаслигини эслатди. Унинг таъкидлашича, кўмак қуруқлик орқали тезроқ ва самаралироқ етказиб берилади.

UNICEF маълумотига кўра, Ғазо сектори шимолида болалар ўртасида умуман тўйиб овқатланмаслик даражаси бир ой ичида икки баробар ошди. Февраль ойида қўллаб-қувватловчи ташкилотлар билан бирга ўтказилган соғлиқни сақлаш сўрови ҳудудда икки ёшгача бўлган ҳар учинчи бола айни муаммодан азият чекаётганини кўрсатди.

Баёнотда ушбу кўрсаткич январь ойида 15,6 фоизни ташкил этгани ва “қисқа вақт ичида ҳайратланарли даражада ўсиб, икки баробар ортгани” эслатилган.

Шунингдек, болалар тўйиб овқатланмаслиги ҳолати тезда секторнинг бошқа жойларига тарқалгани, Исроил армияси ҳужумининг “узоқ оқибати”, ёрдам тарқатишга “давомли чеклов” туфайли “ҳалокатли ва мисли кўрилмаган” даражага етгани таъкидланган.