Тўқаев Россиянинг орденини олишдан ҳам бош тортди
Қозоғистон президенти Қосим-Жўмарт Тўқаев президентлик ваколати тугагунига қадар на маҳаллий, на хорижий мукофотларни олмасликка қарор қилган. Шу сабаб у Россиянинг Александр Невский орденини ҳам қабул қилмади. Бу ҳақда “Tengrinews” нашри хабар бермоқда.
Хабарда таъкидланишича, Россия томони Қосим-Жомарт Тўқаевни Александр Невский ордени билан тақдирлашни таклиф қилган.
"Давлат раҳбари бундай орден берилгани учун миннатдорлик билдирди. Бироқ у президентлик ваколатлари тугагунга қадар ҳам ички, ҳам хорижий мукофотларни қабул қилмасликка қарор қилди. Шу сабаб, яқинда Бишкекка ташрифи чоғида президент Тўқаев Қирғизистоннинг энг олий ордени “Биринчи даражали Манас"ни олишдан ҳам бош тортганди”, дейди Қозоғистон президентининг матбуот котиби Руслан Желдибай.
Эътироф этиш керакки, кеча, 17 июнь куни Россия президенти Владимир Путин иштирокидаги Санкт-Петербург халқаро иқтисодий форумида Тўқаев Қозоғистон ўзини ўзи мустақил деб эълон қилган квази-давлатлар, яъни Донецк ва Луганск Халқ Республикаларини тан олмаслигини айтганди.
