Тошкент вилоятида 10 млрд сўмлик қалбаки косметика воситалари айланмасига чек қўйилди
Тошкент вилоятида 20 дан зиёд турли хорижий брендлар номи остида сифатсиз ҳамда қалбаки косметика ва парфюмерия воситаларининг яширин цехи фаолиятига чек қўйилди. Бу ҳақда Божхона қўмитаси ахборот хизмати бош инспектори “Дарё”га маълум қилди.
Қайд этилишича, Бўка туманида ўтказилган тезкор тадбир давомида яширин цехдан 280 минг қутидан зиёд косметика воситалари вақтинча сақловга олинган бўлиб, уларнинг умумий қиймати 10 миллиард сўмдан ошмоқда.
Шунингдек, Божхона қўмитасининг Таргетлаш ва хавфларни бошқариш бошқармаси, Тошкент вилояти божхона бошқармаси тезкор тузилмалари ва “Яллама” чегара божхона пости ходимлари томонидан ўтказилган тезкор тадбирда контрафакт маҳсулотлар тўхтатиб қолинган.
Божхона кўриги давомида юк автотранспорт воситасига ҳужжатларда қайд этилганидек, кийим илгич, турли эҳтиёт қисмлар, хўжалик моллари каби 13 турдаги товарлар эмас, аксинча, ҳужжатларда умуман кўрсатилмаган 21 турдаги товарлар борлиги аниқланган. Текширув давомида товарлар орасида юз учун крем, лосьон, юз ниқоби, ифор таратувчи суюқликлар, сурма каби косметик воситаларнинг идиш ва қутилари, уларни ишлаб чиқариш ва қадоқлашда фойдаланиладиган турли хом ашё, ёрлиқ ва ҳимоя қатламлари борлиги маълум бўлган. Уларнинг умумий қиймати эса дастлабки ҳисоб-китобларга кўра, 3 миллиард сўмдан ошади.
