Тошкент шаҳрида ёшларнинг 16651 та муаммоси аниқланди

Ўзбекистон Республикаси Президентининг 2018 йил 27 июндаги “Yoshlar – kelajagimiz” Давлат дастури ижросини таъминлаш мақсадида 22 июль куни Тошкент шаҳридаги Мирзо Улуғбек истироҳат боғида Инновацион ривожланиш вазири Иброҳим Абдураҳмонов ҳамда Тошкент шаҳрининг Мирзо Улуғбек тумани ҳокими Шавкатбек Эргашев тумандаги ёшлар билан учрашиб, уларни қийнаётган муаммоларни тингладилар, саволларига батафсил жавоб бердилар.

Тадбирга келган ёшларнинг аксариятида маълум тадбиркорлик фаолиятини олиб бориш учун ғоялари, ўйлаб қўйган режалари бўлиб, улар ишларини бошлаб олишлари учун кредитлар, жой олишда қийинчиликларга дуч келаётганларини айтишди. Уларга “Yoshlar – kelajagimiz” Давлат дастурига асосан бизнес ташаббуслар, стартаплар, ғоялар ва лойиҳаларни амалга ошириш учун тижорат банклари орқали йиллик 7 фоиз ставка билан имтиёзли кредит ва мол-мулкни лизингга бериш йўлга қўйилгани тушунтирилди. Шунингдек, учрашувда қатнашган банк мутахассисларига ёшларнинг кредит олишлари ва улардан тўғри фойдаланишларини таъминлаш мақсадида бизнес-режа тузишларида амалий ёрдам бериши ҳақида кўрсатма берилди.

Учрашувга нафақат ёшлар балки, айрим ёшларнинг оналари ҳам келдики, улар фарзандларига доир муаммоларни ҳал қилишларини сўрашди. Оналарни қийнаётган масала бу коллеж, лицейларда, мактабларнинг юқори синфларида ўқийдиган фарзандларини ишга жойлаштириш, уй-жой масалалари бўлди. Шунингдек, ёшларни ҳарбий хизматга жўнатиш масаласи ҳам кўтарилди. Фарзандини уч йилдан бери муддатли ҳарбий хизматга жўнатишларига эриша олмаган онанинг мурожаати ёзиб олиниб, тез кунларда ўрганиб чиқилиши айтилди.

Бундан ташқари, учрашувда тайёр дастурий лойиҳалари бор ёшлар гуруҳи ҳам ўз ишланмаларини намойиш этди. Улар вазирликка таклиф этилиб, лойиҳани амалга оширишда бевосита кўмак берилишига келишилди.

Ҳозир Тошкент шаҳрининг 11 туманида туман штаблари ҳамда умумлаштирувчи шаҳар штаби ташкил этилган бўлиб, барча штабларда Инновацион ривожланиш вазирлигининг 11 нафар масъул ходимлари бириктирилган. Мазкур штабларда туманлардаги мутасадди идора ва корхоналар масъул ходимлари навбатчилиги ташкил этилган бўлиб, ҳар куни эрталаб соат 8-00 дан кечки пайт 22-00 га қадар улар иштирокида штабга келиб тушаётган мурожаатлар ўрганилиб, тегишли тартибда ҳал этиш ишлари амалга оширилмоқда.

Ҳар бир туманда маҳаллалар сонидан келиб чиқиб тегишли мутасадди 1476 нафар ходимлардан иборат 4 тадан 18 тагача жами 144 та ишчи гуруҳ фаолият юритмоқда.

20 июль ҳолатига Тошкент шаҳридаги жами 494 та маҳалладан 72 таси тўлиқ ўрганиб чиқилди, қолган маҳаллаларда ўрганиш ишлари давом этмоқда. Маҳалладаги ўрганишлар натижасида жами 39308 та хонадонга уйма-уй кириб чиқилган бўлиб, 1166 та муаммолар аниқланган.

Тошкент шаҳар бўйича жами 47081 нафар ёшлар билан мулоқот қилинган бўлиб, улардан 16651 ечимини кутаётган муаммолар борлиги аниқланди. Шундан 1123 нафари ижобий ҳал этилди. 15528 мурожаат ўрганиш жараёнида.

Manba: xs.uz