Тошкент шаҳар суди судьялари “Сайлов қонунчилигини бузганлик учун жавобгарлик” мавзуида давра суҳбати ўтказди

Тошкент шаҳар суди судьялари “Сайлов конунчилигини бузганлик учун жавобгарлик” мавзуида давра суҳбати ўтказди.

Тошкент давлат юридик университетида ўтказилган учрашувда Тошкент шаҳар судининг жиноят ишлари бўйича судьялари Хамиджон Шамшиев, Элбекжон Тургунбоев, Талъат Турсунов, Музаффар Ахмедов, Одилжон Илхомжонов, Ориф Қличев, Анжелика Шамсутдинова, Дурдона Дадаханова, Санжар Махаметов иштирок этишди. “Сайлов конунчилигини бузганлик учун жавобгарлик” мавзуида ўтган давра суҳбатида “Жиноий одил судлов факультети” 2-курс Б-поток талабалари, шунингдек Жиноят ҳуқуқи, криминология ва коррупцияга қарши курашиш кафедраси катта ўқитувчиси Қ.Розимова, ўқитувчилар Н.Хожиев ва Б.Эшкуватов ҳам қатнашди.

Давра суҳбатида сайлов қонунчилигини бузганлик учун маъмурий ҳамда жиноий жавобгарлик, унинг таркиби ва жазо тайинлаш масалалари ҳақида тўхталиб ўтилди. Бундан ташқари, давра суҳбатида маърузачи судьялар сайлов жараёнлари, сайлов ҳуқуқи, сайловда иштирок этадиган фуқароларнинг ҳуқуқлари ва мажбуриятлари Сайлов кодексига биноан ижтимоий хавфи катта бўлмаган ва унча оғир бўлмаган жиноят содир этган шахсларга ҳам сайловларда овоз бериш тартиби, жазони ижро этиш муассаларида сайлов участкаларини тузишга оид масалаларга тўхталиб ўтилди.

Хусусан, “Президент сайлови илк марта янги Сайлов кодексига мувофиқ ўтказилишини муҳим сиёсий янгилик деб баҳолашимиз мумкин. Сайловга тайёргарлик кўриш ва уни ўтказиш очиқлик ва шаффофлик тамойилларига таянган ҳолда ўтказилиши учун 2021 йил 31 май куни “Ўзбекистон Республикасининг Сайлов кодексига ўзгартириш ва қўшимчалар киритиш тўғрисида”ги Қонун қабул қилинди.

Қонун билан Сайлов кодексининг бир қатор моддаларига ўзгартириш ва қўшимчалар киритилди. Яъни, манфаатдор шахс сайлов комиссияларининг қарорлари устидан судга шикоят қилиши мумкинлиги белгиланди. Аввалги қонунчилик бўйича судга ёки юқори турувчи сайлов комиссиясига мурожаат қилиши мумкин бўлганди.

Шикоят бериши мумкин бўлган манфаатдор шахс номзод кўрсатган сиёсий партиялар, номзодлар, ишончли вакиллар, кузатувчилар ва сайловчилар бўлиши ҳам мумкин.

Сайлов қонунчилигини бузганлик учун маъмурий ва жиноий жавобгарликлар белгиланган.

Сайловга оид ҳуқуқбузарликлар учун Маъмурий жавобгарлик тўғрисидаги кодексга алоҳида боб ажратилган. Сайлов ва референдумни ташкил этиш ва ўтказиш соҳасидаги ҳуқуқбузарликлар учун 9 та ҳолатда маъмурий жавобгарлик чоралари белгиланди.

Жиноят кодексида ҳам сайлов қонунчилигини бузганлик учун жиноий жавобгарликни назарда тутувчи алоҳида нормалар мавжуд. Бу нормалар, Жиноят кодексининг 146-моддасида сайлов ёки референдум ташкил қилиш, уларни ўтказиш тўғрисидаги қонунчиликни бузганлик учун, 147-моддасида эса сайлов ҳуқуқининг ёки ишончли вакил ваколатларининг амалга оширилишига тўсқинлик қилиш учун жавобгарлик назарда тутилган.

Бундан ташқари, Сайлов кодексининг 96-моддасига асосан, Ўзбекистон Республикаси Президенти сайловини, Қонунчилик палатасига сайловни ҳақиқий эмас, деб топиш тўғрисидаги қарор Марказий сайлов комиссияси томонидан қабул қилиниши, бу қарор устидан сайлов якунлари эълон қилинган кундан бошлаб ўн кун ичида Олий судига шикоят қилиш мумкинлиги қатъий белгиланди”, - дея Тошкент шаҳар судининг жиноят ишлари бўйича судьяси Хамиджон Шамшиев батафсил маълумотлар берди.
Шунингдек, учрашув якунида талабалар маърузачи судьялардан ўзларини қизиқтирган саволлар юзасидан атрофлича жавоб олишди.