Тирноқ нега эт ичига ўсади?

Кўпчилик инсонлар оёғининг бош бармоғи тирноғи эт ичига ўсаётганидан азият чекади. Бироқ ҳамма ҳам бунга етарлича эътибор қилавермайди. Натижада бир қарашда оддий бўлиб кўринган бу ҳолат, кейинчалик жуда кўп муаммоларга, ҳатто, жарроҳлик амалиётига сабаб бўлади.

❓Хўш, нега оёқ бош бармоғининг тирноғи эт ичига ўсади? Унинг сабаблари ва даволаш усуллари қандай?

— Тирноқнинг эт ичига қараб ўсиши (оникокриптоз) сурункали касаллик бўлиб, тирноқ пластинкаси унинг тўқималарига, яъни латерал қисмига қараб ўсиши билан кечади, — дейди тиббиёт фанлари доктори, профессор Шаҳноза Мавлонова. — Статистик маълумотларга кўра, хирург-шифокорларга мурожаат қилувчи беморларнинг 3-10 фоизида айнан ушбу касаллик аниқланади. Болаларда эса асосан 10-15 ёшда кузатилади.

Хасталик кўпинча юриш пайтида, айниқса, тор пойабзал кийган вақтда ўсган тирноқ жойида оғриқ билан бошланади. Кейинчалик эса тирноқ бурмасининг қизариши ва шиши пайдо бўлади. Сўнгра тирноқ пластинкаси остидан йиринг ҳосил бўлиши ва чиқиши, баъзан қон кетиши билан кечади.

Афсуски, аксарият беморлар уйда муаммони мустақил ҳал қилишга уриниб, узоқ вақт шифокорга боришни кечиктиради. Бу эса салбий асоратларга, умумий ҳолатнинг ёмонлашишига, яллиғланиш жараёнининг қўшни тўқималарга тарқалишига олиб келади. Бемор эса оғриқ зўрайиб, унга чидашнинг имкони бўлмагандагина шифокорга мурожаат қилади. Шу сабабли касаллик сурункали тус олади.

👞Тирноқнинг эт ичига қараб ўсишини кўпинча нотўғри танланган пойабзал туфайли келиб чиқади, деб ўйлашади. Бу ҳам асосий омиллардан бири.

Шу билан бирга, тирноқни нотўғри олиш, яъни ойсимон шаклда калталатиш ҳам унинг тузилишига таъсир этиши мумкин.

Шунингдек:
✅ оёқнинг ортопедик касалликлари;
✅ тирноқнинг инфекцион замбуруғли хасталиклари;
✅оёқ бармоқларининг жароҳатлари ва яралари;
✅организмда витаминлар ва микроэлементларнинг етишмаслиги;
✅айрим ички органлар касалликлари;
✅псориаз;
✅қандли диабет;
✅семизлик
✅наслий мойиллий ва бошқалар ҳам ушбу касалликнинг келиб чиқишига сабаб бўлиши мумкин.

🧑🏻‍⚕️Хасталикни даволаш учун шифокор-дерматолог ҳамда яшаш манзили бўйича оилавий поликлиника ёки оилавий шифокор пункти жарроҳига мурожаат қилиш лозим. Ушбу мутахассислар беморга тирноқ шаклининг ўзгаришига сабаб бўлган омилларни аниқлаб, шунга мувофиқ муолажаларни тавсия қилади.

❗️Дастлаб ушбу хасталик консерватив усулда даволанади. Бу орқали йирингли яллиғланиш жараёнларига қарши курашилиб, оғриқнинг интенсивлиги камайтирилади. Йиринглаш ва бошқа асоратларни ривожланишига йўл қўймаслик учун муолажалар мутахассис томонидан белгиланиши керак.

♻️Агар консерватив усуллар самара бермаса, у ҳолда жарроҳлик даволаш қўлланилади. Хусусан, тирноқ ичига ўсиб кетган бўлса, лазер ёрдамида коррекция қилинади. Қолаверса, ҳозирда махсус пластинкалар ҳам қўлланилаётган бўлиб, ушбу восита тирноқнинг этга қараб ўсишидан ҳимоялайди. Хасталик тўғри даволанилса, кейинчалик қайталанмайди.