Тиббий таълим йўналишида 10 та муҳим ўзгариш нималардан иборат?

Сўнгги йилларда юртимизда тиббиёт йўналишида илғор таълим стандартлари асосида юқори билимга эга мутахассислар тайёрлашга алоҳида эътибор қаратилмоқда. Соғлиқни сақлаш вазирлиги бошқарма бошлиғи Ўктам Исмаилов тиббий таълим соҳасида юз берган 10 та энг муҳим ўзгариш ҳақида маълумот берди:

1️⃣ Энг аввало, олий тиббий таълим муассасалари сони 11 тага етди.

Тошкент тиббиёт академиясининг Термиз филиали, Фарғона жамоат саломатлиги тиббиёт институти (ФЖСТИ) ва Қорақалпоқ тиббиёт институтлари ташкил этилди.

2️⃣ Тошкент, Сирдарё, Жиззах Навоий, Қашқадарё ва Наманган вилоятлари олий таълим муассасаларида 6 та тиббиёт факультети очилди.

3️⃣ Бухоро шаҳрида замонавий қулайликларга эга тиббиёт кампуси бунёд этилди.

4️⃣ Бухоро давлат тиббиёт институтида Туркиянинг соғлиқ билимлари университети билан ҳамкорликда Туркия тиббиёт факультети, Тошкент шаҳрида Н.И. Пирогов номидаги Россия тиббиёт университетининг филиали ва Жиззах шаҳрида Қозон федерал университети филиали ташкил этилди.

5️⃣ Россия, Корея, Германия, Туркия, Ҳиндистон, Италия, Хитой, Польша, Беларусь, Украина каби қатор давлатларининг 22 та университети билан 12 та бакалавриат таълим йўналиши, 10 та магистратура ва 8 та клиник ординатура мутахассисликлари бўйича халқаро қўшма таълим дастурлари асосида кадрлар тайёрлаш тизими йўлга қўйилди.

6️⃣ Бакалавриатда 4 та янги таълим йўналиши очилиб, қабул квотаси 2,4 баробар, магистратурада очилган 14 та янги мутахассиcлик ҳисобига квоталар 3 баробар, клиник ординатурадаги 6 та янги мутахассислик ҳисобига эса квоталар сони 2 баробарга оширилди.

7️⃣ Интернатура жорий этилиб, 19 та йўналишда йилига 500 нафар тор соҳа мутахассиси тайёрланмоқда.

8️⃣ Ўқув режаларидаги номутахассис фанлар улуши 2 баробарга қисқартирилди.

9️⃣ Хориждан 350 нафар профессор-ўқитувчи ўқув жараёнига жалб қилинди. Натижада илмий салоҳият 32 фоиздан 46 фоизга ошди.

🔟 6 минг нафар битирувчи курс талабаларини жалб қилган ҳолда, оилавий шифокорлар вакансияси 80 фоизга, тор мутахассислар эса вакансияси 50 фоизга қисқарди.