Термиз ҳокимлиги ўзини ёқиб юборган эркак тўғрисидаги мақолаларга раддия билдирмоқда

Сурхондарёлик эркакнинг Термиз ҳокимияти биноси олдида ўзини ёқиб юборганлиги ҳолати ҳамон қизғин муҳокамалар остида.

Сурхондарё вилояти ҳокимлиги DARYO.UZ сайтидаги Сурхондарёда ўзини-ўзи ёқиб юборган фуқаро бўйича маълумот ва KUN.UZ сайтидаги Термиз туман ҳокимлиги ҳовлисидаги воқеа бўйича расмий маълумот сарлавҳали мақолалар юзасидан РАДДИЯ билдирмоқда. Раддия 2 март куни Сурхондарё вилояти ҳокимлигининг фейсбукдаги Сурхондарё вилояти ҳокимлиги Баҳодир Пўлатов саҳифасида келтирилмоқда.

2019 йил 25 февраль куни соат тахминан 11:20 ларда Термиз тумани, Учқизил маҳалласи Ат-Термизий кўчаси марказида Термиз тумани Янгиҳаёт маҳалласида яшовчи, 1979 йил 7 июн куни туғилган, фуқаро Эрданов Бахтияр Юсупович ўзи билан олиб юрган 0.5 литр ҳажмдаги 1 дона полиэтилен идишда бўлган бензин ёқилғисини устига сепиб, қўлида бўлган зажигалка ёндирғич орқали олов бериб ўзини ёқиб юборган.

Фуқаро Б.Эрданов бутун танани 15-20 % қисмини I-II даражали алангадан термик куйиши, ЎРТАЧА оғирликдаги тан жароҳати деб баҳоланганлиги кўрсатилган.

Ижтимоий тармоқдаги ҳабарларга кўра, фуқаро Эрданов Бахтиярнинг кредитга олинган пуллар эвазига очган кафеси жойлашган бино бузиб ташлангани, бу масалада бир неча ойдан буён туман ҳокимлигига мурожаат қилгани, бироқ қабулга кира олмагани баён этилган.

Ваҳолангки, Эрданов Бахтиёр ёки оила аъзолари тадбиркорлик фаолиятини амалга ошириш учун якка тартибдаги тадбиркор сифатида давлат рўйхатидан ўтмаган. Қолаверса, ҳеч қанақа кафе кўринишидаги бино ва иншооти кўчмас мулк сифатида мавжуд бўлмаган.

Унинг фаолияти қўлбола тайёрланган енгил конструкцияли кичик хонада санитария ва гигиена талабларига зид тарзда пирожки пишириб сотиш бўлган. Айнан шу енгил конструкцияли кичик хона ўзбошимчалик билан қурилиб фаолият олиб борилгани учун туман мутасаддилари томонидан бартараф этилган.

Шу каби, Эрданов Бахтияр билан суҳбатлашилганда, у ўз кўрсатмасида, 2018 йил август ойида турмуш ўртоғи савдо учун 15 млн сўм кредит олганлиги, кредитни қисман тўлаб, 9 млн 545 минг сўм қарз бўлиб қолгани, ушбу кредитни тўловини тўламасдан Тожикистон Республикасига 4 ойга кетиб қолганлиги, ушбу ҳаракатларни сиқилиши натижасида содир этганлигини, ўзига ўт қўйган вақтида катта ўғлига телефон орқали видео тасвирга ёзиб олишни айтганлиги, у муқаддам туманда қўл бола перашки тайёрлаб сотганлигини, бироқ тадбиркор эмаслигини баён этган.

Бундан ташқари, Эрдонов Бахтиёрнинг ушбу масалада бир неча ойдан буён туман ҳокимлиги мурожаат қилгани, туман ҳокими қабулига кира олмагани ҳолати ҳақидаги важлар бўйича вилоят ҳокимлиги томонидан хизмат текшируви тайинланган ва натижалари ҳақида қўшимча хабар берилади дейилади вилоят ҳокимлиги матбуот хизматининг изоҳида.