Татар давлат филармониясида Татаристон киносининг юз йиллиги шарафига тантанали тадбир бўлиб ўтди

Байрам дастурида МДҲ мамлакатлари киностудиялари раҳбарлари, республика кино саноати фахрийлари, режиссёрлар, продюсерлар, Татаристон кино муассасалари вакиллари, «Татаркино»нинг Москва ва Россиянинг бошқа ҳудудларидаги ҳамкорлари иштирок этди. Татаристон Республикаси Маданият вазири Ирада Аюпова табрик сўзи билан чиқиш қилиб, Татаристон Республикаси Раиси Рустам Минниханов номидан «Татаркино» маданият муассасаси ходимларига миннатдорчилик мактуби топширди.

Татаристон киносининг 100 йиллигини нишонлаш доирасида Қозонга МДҲ давлатларининг тўртта асосий киностудиялари раҳбарлари: Ўзбекистон Республикаси Маданият вазирлиги ҳузуридаги Кинематография агентлиги директори Фирдавс Абдухолиқов, «Қозоқфильм» вице-президенти Аидар Омаров, «Қирғизтасмаси» давлат кино маркази директори Талантбек Талобеков ва «Беларусфильм» бош директори Юрий Алексей ташриф буюришди. Хорижлик меҳмонлар «Татаркино»нинг бир асрлик ижоди алоҳида ҳурматга лойиқ эканлигини, ҳудуд кино ишлаб чиқариш тарихида ўзининг бой мероси билан ажралиб туришини таъкидлади. Меҳмонлар ҳамкорликда фильмлар яратиш ва уларни ўзаро алмашиш имкониятларини кенгайтиришда фаол ҳамкорлик қилиш истагини билдирди.

Қозон давлат маданият институтида Татаристон киносининг 100 йиллигини нишонлаш доирасида «Ҳамкорликда ишлаш – киноиндустрия ривожланишининг драйвери» мавзусида давра суҳбати бўлиб ўтди.

Илк марта битта дастурда Ўзбекистон, Қозоғистон, Беларусь ва Қирғизистондан тўртта асосий киностудия раҳбарлари иштирок этди. Шунингдек, Россия ҳамда Татаристоннинг таниқли кино мутахассислари, маданият муассасалари директорлари, продюсерлар ва режиссёрлари тадбирнинг фахрий меҳмонлари бўлди.

Давра суҳбатида киноижодкорлар Россия Федерацияси ва МДҲ давлатлари киностудиялари ўртасида қўшма лойиҳаларни амалга ошириш, ҳамкорлик алоқаларини ривожлантиришнинг долзарб масалалари ва вазифаларига тўхталиб ўтди.

Қозон давлат маданият ва санъат институти ректори Роза Ахмадиева сўзга чиқиб, меҳмонларга ташриф учун миннатдорчилик билдирди:

"Аввало, сиз, азиз меҳмонларга Татаристон Республикаси ва «Татаркино» билан ҳамкорлигингиз учун ўз миннатдорчилигимни билдираман. Россияда кино саноатини ривожлантиришга катта эътибор берилмоқда, соҳага оид лойиҳалар ва меъёрий ҳужжатлар яратилмоқда. «Татаркино»нинг 100 йиллиги ва ташрифингиз халқаро ҳамкорлик аҳамиятининг юқорилигидан далолат беради", – деди Роза Ахмадиева.

Кинематография агентлиги директори Фирдавс Абдухолиқов Россия ва Ўзбекистон ўртасидаги ҳамкорлик истиқболлари ҳақида гапирди:

"Биз «Татаркино» билан илиқ муносабатларга эгамиз. Бир неча йилдан буён янги давлат сиёсати доирасида ўз тажрибаларимиз билан ўртоқлашиб келяпмиз. Кинематография агентлиги таълим йўналишида иш олиб боради, тўрт йил аввал Тошкент шаҳрида ВГИКнинг филиалини очдик. Шунингдек, мунтазам равишда Россия ва Татаристон киноси кунларини ташкил қилиб келамиз. Учинчи йўналиш эса ҳамкорликда ишлаш. Ҳар йили бизга Тошкент ва Бухорода фильм суратга олиш учун бир қанча кинокомпаниялар таклиф билан чиқади, - дея таъкидлади Агентлик раҳбари.

Давра суҳбатида, шунингдек, янги ҳамкорликдаги лойиҳа тақдимоти ҳам бўлиб ўтди, бу ҳақда Ф. Абдухолиқов сўзлаб берди, фильм концепцияси эса режиссёр, Татаристон Республикасида хизмат кўрсатган артист Салават Юзеев томонидан тақдим этилди. «Устоз» лойиҳасида татар мусулмон олими ва педагоги Шиғабутдин Маржонийнинг ҳаёт йўли мисолида Ўзбекистон ва Татаристоннинг бадиий тарихи ҳақида ҳикоя қилинади. Қаҳрамон ҳаёти давомида кўплаб илм талабида бўлган ёшларга дуч келади ва фильм номида акс этган мақомга етишади.

13 март куни эса Қозон шаҳрида Татаристон киносининг юз йиллигини нишонлаш доирасида ўзбек киноси кунларининг тантанали очилиши бўлиб ўтди.

Очилиш маросимида Ўзбекистоннинг Қозон шаҳридаги Бош консуллигининг биринчи котиби Азизбек Раззоқов, Ўзбекистон Республикаси Маданият вазирлиги ҳузуридаги Кинематография агентлиги директори Фирдавс Абдухолиқов, продюсер, «Бухорийлар» киностудияси асосчиси ва бош директори Улуғбек Абдуллаев ва бошқалар тадбирнинг фахрий меҳмонлари бўлди.