Сурхондарёда топилган ноёб айиқ боласига ном қўйиш учун танлов эълон қилинди

Табиат ресурслари вазирлиги тасарруфидаги «Узун» давлат ўрмон хўжалиги ҳудудида тахминан 11 ойлик айиқ боласи топилди. У Тянь-Шан қўнғир айиғи турига мансуб бўлиб, Табиатни муҳофаза қилиш халқаро иттифоқининг «Қизил рўйхати» ва Ўзбекистон «Қизил китоби» га киритилган.

Дастлаб айиқни очиқ табиат қўйнига қўйиб юбориш масаласи муҳокама қилинди. Аммо айни дамда аномал совуқдан кейин озуқа топиш қийинлиги, ёш айиқ боласини турли кўнгилсизликлардан асраш мақсадида Тошкент ҳайвонот боғига олиб келинди.

«Бундай турдаги айиқлар кам тарқалган, Ўзбекистон фаунаси учун ноёб тур ҳисобланади, — деди Табиат ресурслари вазирлиги бошқарма бошлиғи Абдурашид Содиқов. — Шу боис Тошкент ҳайвонот боғи маъмурияти ёрдами билан айиқ боласини замонавий реабилитация марказига жойлаштирдик. Айни дамда айиқ боласининг аҳволи яхши».

Таъкидлаш керакки, Тошкент ҳайвонот боғи реабилитация маркази Марказий Осиёда ягона ҳисобланади. Ўтган йили фойдаланишга топширилган марказ Германия лойиҳаси асосида қурилган ҳамда энг сўнгги немис лаборатория ускуналари билан жиҳозланган.

Қайд этиш жоизки, айни дамда айиқ боласи карантинда сақланмоқда. Бу ерда у махсус рецепт асосида парвариш қилиняпти.

«Аномал совуқда айиқлар уйқуга кетади. Бу айиқ боласининг ҳам онаси қаттиқ уйқуда бўлган, у эса онасидан узоққа ҳаракатланиб кетган. Натижада озуқа топишга қийналган. Шунинг учун ҳам ҳозир унинг вазни 18 килограммга тенг, аслида эса у 35-40 кг бўлиши керак эди. Биринчи кунда айнан нима ейишини билиб бўлмади. Секин-аста мева-сабзавотлар, гуруч, гўшт ва бошқа ейдиган рационини аниқлаб оляпмиз, — деди Тошкент ҳайвонот боғи бош ветеринари Аҳмаджон Кузибаев. — Аслида, айиқлар рационининг тахминан 20 фоизини гўшт ташкил қилади. Аммо ҳозирча бу айиқ боласига енгироқ овқат беряпмиз. Вақт ўтгани сари рационни кучайтириб борамиз».

Абдурашид Содиқов Табиат ресурслари вазири Азиз Абдуҳакимов ташаббуси билан айиқ боласига ном қўйиш учун танлов эълон қилинишини маълум қилди. Танлов ғолиби йил давомида Тошкент ҳайвонот боғига бепул кириш ҳуқуқини берувчи сертификат билан тақдирланади.

Шуни алоҳида таъкидлаш лозимки, карантин муддати тугагач, айиқ боласини ҳолатига қараб очиқ табиат бағрига қўйиб юбориш режалаштирилган.