«SRK Consulting» компаниясининг хулосасига кўра, “Ёшлик-1” кони дунёда маъдан таркибида олтин ҳажми бўйича йирик кон, дея тан олинди

Ахборот ва оммавий коммуникациялар агентлиги томонидан Олмалиқ кон-металлургия комбинати билан ҳамкорликда давлат ҳокимияти ва бошқаруви органлари ахборот хизмати раҳбарлари ҳамда оммавий ахборот воситалари вакиллари учун пресс-тур ташкил этилди.

Унда иштирокчилар “Олмалиқ КМК” АЖ Ахборот хизмати фаолияти ҳамда комбинат томонидан амалга оширилаётган лойиҳалар, жумладан, Ўзбекистон тарихидаги энг йирик инвестиция лойиҳаларидан бири бўлган “Ёшлик 1” конини ўзлаштириш жараёнлари билан танишдилар.

Маълумки, Олмалиқ кон-металлургия комбинати – мис-молибден, полиметалл ва олтин таркибли маъданларни қазиб олиш ва қайта ишлаш бўйича Ўзбекистонда ва Марказий Осиёда етакчи саналиб, мис маҳсулотларини ишлаб чиқариш бўйича дунёдаги 30 та йирик корхона сафига киради.

Бу ерда йилига 148 минг тоннадан ортиқ мис катоди, 90 минг тонна рух метали, шунингдек, олтин ва кумуш қимматбаҳо металлари, молибден, вольфрам, рений, селен, теллур ва кадмий каби ноёб металлар ишлаб чиқарилади. ОКМК 17 хил маҳсулотни 16 та хорижий давлатга экспорт қилади.

Маъдан таркибида олтин ҳажми бўйича комбинат заҳиралари 1-ўринда, мис конларидаги маъдан ўртача олтин таркиби бўйича 2-ўрин, маъдан ҳажми бўйича 3-ўрин, таркибидаги мис ҳажми бўйича 6-ўринни эгаллайди.

35 мингдан зиёд ишчи-ходим фаолият юритаётган комбинат таркибида 6 та кончилик корхонаси, 5 та бойитиш фабрикаси, мис эритиш ва рух заводлари, Нодир металлар ва қаттиқ қотишмалари илмий-ишлаб чиқариш бирлашмаси, марказий таъмирлаш-мехника заводи, оҳак заводи, саноат темирйўл транспорт бошқармаси, автомобиль ва технологик транспорт бошқармалари, истеъмол моллари ишлаб чиқариш бошқармаси, шунингдек, 20 дан ортиқ ёрдамчи цех ва лабораториялар мавжуд.