Швециянинг Афғонистон бўйича қўмитаси ўз фаолиятини тўхтатди
15 март куни Афғонистонга ёрдам кўрсатиш бўйича Швеция махсус қўмитаси Афғонистондаги фаолиятини тўлиқ тўхтатганини маълум қилди. Бу ҳақда Etilaatroz нашри хабар берди.
Швеция томони берган маълумотга кўра, бу қарор “Толибон” ҳаракати талаби билан қабул қилинган. Ташкилот мутасаддилари шу қарор ортидан ўз ходимлари хавфсизлигини таъминлашни мақсад қилган. Эндиликда ташкилот фаолияти мамлакатда номаълум муддатга тўхтайди.
Олдинроқ “Толибон” Швецияда Қуръон ёқилиши билан боғлиқ ҳолат рўй бериши ортидан Стокгольм билан боғланган ҳар қандай ташкилот фаолияти тўхтатилишини маълум қилган эди. Швеция масъуллари мусулмонлардан кечирим сўрамагунча улар фаолияти қайта тикланмаслиги айтилган.
Швециянинг Афғонистон бўйича қўмитаси бош котиби Андреас Стефанссоннинг айтишича, “Толибон” буйруғидан сўнг ташкилотга халқаро ёрдам тўхтаган. Шунга қарамай, Қўмита маҳаллий ва минтақавий ёрдам лойиҳаларини бир мунча амалга ошира олган.
Маълумот ўрнида, Швециянинг Афғонистон бўйича қўмитаси сўнгги 40 йил давомида Афғонистонда фаол бўлиб, аҳолининг ночор қатламлари, жумладан, аёллар, болалар ва ногиронлар учун ривожланиш дастурларини амалга ошириб келган. Ушбу ташкилотнинг Афғонистоннинг турли ҳудудларида 6000 дан ортиқ ходими борлигини айтилади.
