Шавкат Мирзиёев: «Янги Ўзбекистон — инвесторлар учун очиқ, эркин ва ишончли мамлакат»

Тошкентда Хорижий инвесторлар кенгашининг навбатдаги мажлиси бўлиб ўтди. Президент Шавкат Мирзиёевнинг мажлисдаги нутқи мамлакатдаги инвестицион муҳит, ислоҳотлар ва келажакка қаратилган стратегия тамойилларини яққол намоён этади.

Шаффоф мулоқот ва амалий натижалар

Ўзбекистон янги тараққиёт босқичида. Бугун инвесторлар нафақат шерик, балки янги тарихнинг ҳаммуаллифи сифатида кўрилмоқда. Президент Мирзиёев Хорижий инвесторлар кенгашининг йиғилишида ана шу ғояни илгари суриб, форумлар ва мулоқотлар амалий натижага қаратилган бўлиши лозимлигини таъкидлади. Бу йўналишдаги дастлабки қадамлар самара бермоқда. Мисол учун, Европа тикланиш ва тараққиёт банки томонидан 2023 йили Ўзбекистонга 1 миллиард доллар миқдорида инвестиция йўналтирилган — бу банк учун минтақадаги рекорд кўрсаткич ҳисобланади.

Бунинг ўзиёқ сўнгги йиллардаги очиқлик сиёсати, инвестициявий муҳитни яхшилаш ва ҳукуматнинг тузилмавий ислоҳотларга содиқлигига бўлган ишонч ифодасидир.

«Яшил иқтисодиёт» — келажак пойдевори

Президент нутқида алоҳида эътибор қаратилган йўналишлардан бири — «яшил» энергия ва экологик барқарор ривожланиш масаласи бўлди. Ушбу соҳада дунёдаги етакчи компаниялар — «Acwa Power», «Masdar», «Linde», «Total Energies» ва бошқалар томонидан 8 миллиард доллардан ортиқ инвестиция жалб қилинган.

Бугун Ўзбекистон табиий ресурсларга асосланган иқтисодиётдан ташқари, инновацион, экологик ва рақамли ечимлар сари йўл олмоқда. Хусусан, «DataVolt» компанияси минтақадаги энг йирик «яшил дата марказ»ни қуришни бошлаган бўлса, «Veon» сунъий интеллектга асосланган мобил супер-илова лойиҳасини амалга оширмоқда.

2028 йилгача бизнес учун асосий солиқ ставкалари ўзгармайди

Инвесторлар учун қонунчилик муҳитининг барқарорлиги ҳар қандай сармоя қарорининг асосий омилларидан бири. Президент 2028 йилгача бизнес учун асосий солиқ ставкаларининг ўзгармаслигини эълон қилиши ана шундай ишончни мустаҳкамловчи қадам бўлди. Шу билан бирга, давлат-хусусий шериклик асосида инфратузилма соҳаларида 4,5 миллиард долларлик лойиҳалар бошланган.

Бу фақат давлат ташаббуси эмас. Инвесторлардан келиб тушган 40 дан ортиқ таклифлар чуқур таҳлил қилинмоқда ва улар асосида қонун, фармон ва қарорлар қабул қилиниши белгиланди. «Knauf», «TBC», «Ernst & Young» каби компаниялар берган таклифлар жамоавий ислоҳотлар жараёнининг амалий жиҳатини намоён этмоқда.

Халқаро шерикликда янги босқич

Президент нутқида яна бир муҳим таклиф илгари сурилди: Хорижий инвесторлар кенгаши котибиятини мустақил юридик шахс сифатида қайта ташкил этиш. Бу Кенгашни техник орган эмас, балки реал инвестицион сиёсат шаклланишидаги марказий мулоқот платформаси сифатида кўришга хизмат қилади.

Шунингдек, электр тармоқларига уланиш, кадрлар тайёрлаш, корпоратив бошқарувни яхшилаш, солиқ маъмурчилиги бўйича алоҳида ишчи гуруҳлар ташкил этилиши режалаштирилгани, инвестиция муҳитини янада такомиллаштиришга қаратилган кенг қамровли ёндашувдир.

Янги Ўзбекистоннинг ҳаммуаллифлари

Мулоқот якунида Шавкат Мирзиёев Янги Ўзбекистоннинг инвесторлар учун «очиқ, эркин ва ишончли мамлакат» эканини яна бир бор таъкидлади. Бугунги ислоҳотлар ортга қайтмайди. Президент ўз нутқини муҳим чақириқ билан якунлади: «Сизларни юртимизга шунчаки сармоя киритишга эмас, балки муваффақиятимиз тарихининг чинакам иштирокчиларига, биз яратаётган буюк келажакнинг ажралмас қисмига айланишга чорлаймиз».

Демак, инвесторлар энди фақат молиявий иштирокчи эмас, балки Янги Ўзбекистоннинг ҳаммуаллифларидир.