Шавкат Мирзиёев Фаррух Зокировга «Буюк хизматлари учун» орденини топширди

Кўксарой қароргоҳида Президент Шавкат Мирзиёев иштирокида миллий эстрада санъатининг ёрқин намояндаси, Ўзбекистон халқ артисти Фаррух Зокировнинг 80 йиллик таваллуд айёми муносабати билан тантанали тадбир бўлиб ўтди.

Унда давлат ва жамоат арбоблари, маданият ва санъат намояндалари, ижодкор зиёлилар, «Ялла» ансамбли аъзолари ҳамда кенг жамоатчилик вакиллари иштирок этди.

Давлатимиз раҳбари сўзга чиқиб, Фаррух Зокировни ушбу қутлуғ сана билан самимий қутлади, унга сиҳат-саломатлик, оилавий хотиржамлик ва янги-янги ижодий ютуқлар тилади.

Таъкидланганидек, Зокировлар сулоласи кўп йиллардан буён миллий мусиқа ва қўшиқчилик санъатимизнинг ривожига беқиёс ҳисса қўшиб келмоқда. Ўзбекистон халқ артисти Карим Зокиров асос солган санъат мактаби, миллий ўзбек эстрадаси асосчиларидан бири Ботир Зокировнинг бой ижодий мероси халқимизнинг улкан маънавий бойлиги сифатида юксак қадрланади.

Бутун бир оила ва авлоднинг ўз умрини санъат ва маданият равнақига бағишлаши дунёда кам учрайдиган ноёб ҳодиса экани алоҳида қайд этилди. Фаррух Зокиров ана шу улуғ анъаналарни муносиб давом эттириб, миллий эстрада санъатини янги босқичга олиб чиққан санъаткор сифатида эътироф қилинди.

Тадбирда Фаррух Зокиров нафақат халқимиз, балки бутун Марказий Осиё, Ҳамдўстлик мамлакатлари ва туркий элларнинг севимли санъаткори экани таъкидланди. Унинг Ўзбекистон ва Қорақалпоғистон халқ артисти деган фахрий унвонлар билан бир қаторда Қозоғистон, Қирғизистон, Тожикистон, Озарбайжон, Татаристон, Бошқирдистон ва Ингушетия халқ артисти деган юксак унвонларга сазовор бўлгани унинг ижодига берилган катта баҳо сифатида қайд этилди.

Бугун Фаррух Зокиров деганда «Ялла» ансамбли, «Ялла» деганда эса Фаррух Зокиров сиймоси кўз олдимизда гавдаланади. Мана 55 йилдирки, ушбу машҳур жамоа нафақат мамлакатимизда, балки дунёнинг нуфузли саҳналарида ҳам гўзал қўшиқлар куйлаб, миллионлаб мухлислар меҳрини қозониб келмоқда. «Ялла» ансамбли жамоавий эстрада ижрочилигини йўлга қўйиб, юртимиз санъати ва маданияти тарихида бутунлай янги саҳифа очди. Бугун халқимизнинг байрамлари, муҳим тадбирлари ва қутлуғ айёмларини ушбу ансамбл ижросидаги қўшиқларсиз тасаввур этиб бўлмайди.

Тадбирда «Ялла» ансамбли аъзолари Жавлон Тўхтаев, Аббос Алиев, Темур Халиков ва Игорь Халиковнинг ҳам кўп йиллик самарали фаолияти эътироф этилди.

Давлатимиз раҳбари Фаррух Зокировнинг юртимиз ижтимоий-маданий ҳаётидаги фаол иштирокига ҳам алоҳида тўхталиб, унинг юзлаб ёшларга устозлик қилиб, уларни катта саҳналарга олиб чиқаётгани, «Овоз» каби йирик лойиҳалар орқали янги истеъдодларга санъат сирлари ва саҳна маданиятини ўргатаётгани барча учун ҳақиқий ибрат эканини таъкидлади.

Минтақа ижодкорлари билан йўлга қўйилган ҳамкорлик халқлар ўртасида маънавий кўприк вазифасини ўтаётгани қайд этилди. Шунингдек, давлатимиз Фаррух Зокиров каби санъат дарғаларининг халқаро ижодий лойиҳалари ва янги асарларини ҳамиша қўллаб-қувватлаши таъкидланди.

Тантанада Фаррух Зокировнинг кўп йиллик самарали меҳнати, миллий маданиятимиз ва санъатимизни ривожлантириш йўлидаги фидокорона хизматларини муносиб тақдирлаш мақсадида Президент томонидан алоҳида фармон ва қарор имзолангани эълон қилинди.

Хусусан, Яшнобод туманидаги 7-сонли болалар мусиқа ва санъат мактабига Фаррух Зокиров номи берилади.

Ушбу мактабда «Ялла» номидаги болалар ансамбли, ёшлар ижодий лабораторияси, замонавий овоз ва видео ёзиш студияси ташкил этилади. «Устоз-шогирд» анъаналари асосида эстрада йўналиши бўйича ижрочилик маҳорати синфлари йўлга қўйилади, устоз ижодкорларнинг ойлигига қўшимча устама тўланади. Мактабда аъло баҳоларга ўқиётган ўқувчилар учун ихтисослашган санъат ва маданият таълим муассасаларига қабул бўйича алоҳида имкониятлар яратилади. Ҳар йили республика ҳудудларидан иқтидорли ўқувчилар мазкур мактабда ўз маҳоратини ошириб боради. Бюджет ҳисобидан иқтидорли ўқувчилар устозлари билан бирга нуфузли халқаро кўрик-танловларга юборилади ва муносиб рағбатлантирилади.

Тадбирда ушбу таълим даргоҳи юртимиздаги энг намунавий масканлардан бирига айланиб, Зокировлар сулоласи яратган бебаҳо ижодий меросни келажак авлодга етказишга хизмат қилишига ишонч билдирилди.

Тантанали маросимда Президентимиз миллий санъатимиз ва маданиятимизни ривожлантириш йўлидаги кўп йиллик беқиёс хизматлари учун Фаррух Зокировга «Буюк хизматлари учун» орденини топширди.