Исроилликлар Нетаньяхудан 180 нафар фаластинлик ўсмирни озод қилишни талаб этмоқда (ВИДЕО)

Шанба куни минглаб исроилликлар ҳукуматга қарши намойишга чиқди, деб хабар бермоқда РИА Новости мухбири.

Митинг Тель-Авивдаги Театр майдонида бўлиб ўтмоқда. Унда асосан Исроил бош вазири Биньямин Нетаньяҳу раҳбарлигидаги ўнг қанот ҳукумат сиёсатига қарши чиқувчи сўл сиёсий кучлар тарафдорлари иштирок этмоқда.

Мухбирнинг қайд этишича, бу гал намойишчиларнинг ҳаракатлари аввалги ҳафталарга нисбатан анча мувофиқлаштирилган ҳолда ташкил этилган. Театр майдонидаги митинг бошланишидан олдин юзлаб фаоллар шаҳар марказий кўчалари бўйлаб юриш қилиб, муддатидан аввал сайловлар ўтказишни талаб қилган.

Намойишчилар қўлларида ҳукуматни минтақада тинчликпарвар сиёсат юритишга чақирувчи плакатларни кўтариб чиққан. Шунингдек, демократик қадриятларни ҳимоя қилиш ҳақидаги шиорлар ҳам янграмоқда. Исроил жамиятининг мазкур қисми Фаластин ҳудудларида яҳудий аҳоли пунктларини қуриш ва Иордан дарёсининг Ғарбий соҳилини аннексия қилишга қаратилган сиёсатга қарши чиқмоқда.

Фаоллар, жумладан, Исроил қамоқхоналарида суд ва терговсиз сақланаётганини таъкидлаётган 180 нафар фаластинлик ўсмирни озод қилишни талаб қилмоқда. Исроил либерал жамоатчилигининг асосий талабларидан бири — 2023 йил 7 октябрдаги ҲАМАС ҳужумининг олдини олишда йўл қўйилган камчиликларни текшириш бўйича давлат комиссиясини тузишдир. Уларнинг фикрича, айнан шу муваффақиятсизлик Исроилни минтақадаги узлуксиз ҳарбий можаролар гирдобига олиб кирган.

Намойиш ўтказилаётган ҳудудда полиция ходимлари навбатчилик қилмоқда. Бироқ акция маҳаллий ҳокимият билан келишилган ҳолда ўтказилаётгани ва жамоат тартиби бузилмаётгани сабабли ҳуқуқ-тартибот органлари жараёнга аралашаётгани йўқ.

Шунга ўхшаш ҳукуматга қарши акциялар шанба куни Исроилнинг бошқа йирик шаҳарлари, жумладан Қуддус ва Ҳайфа шаҳарларида ҳам ўтказилмоқда.

2016 йил декабрь ойида БМТ Хавфсизлик Кенгаши Исроилнинг аҳоли пунктлари қуриш фаолиятини тўхтатишни талаб қилувчи 2334-сонли резолюцияни қабул қилган эди. Бироқ Исроил мазкур ҳужжат талабларини бажаришдан бош тортган. Жорий йилнинг 8 февралида эса Исроил раҳбарияти Ғарбий соҳилдаги фаластин ҳудудлари устидан назоратни кенгайтиришга қаратилган чора-тадбирларни, жумладан, исроиллик кўчманчиларга ер сотиш бўйича тақиқни бекор қилишни маъқуллаган.

2023 йил 7 октябрдан буён давом этаётган ҲАМАС ва Исроил ўртасидаги можаро давомида 70 мингдан ортиқ фаластинлик ҳалок бўлган, 170 мингдан зиёд киши яраланган. Исроил маълумотларига кўра, можаро қурбонлари орасида камида 1,2 минг нафар Исроил фуқароси ҳам бор.