Шаҳрисабзда навбатдаги ёшлар экология ва туризм халқаро қурултойи расман очилди!
![Шаҳрисабзда навбатдаги ёшлар экология ва туризм халқаро қурултойи расман очилди! Шаҳрисабзда навбатдаги ёшлар экология ва туризм халқаро қурултойи расман очилди!](/photos/news/OapykoX2GzHYY1K.jpeg)
9 август куни Қашқадарё вилояти Шаҳрисабз шаҳрида «Ёшлар - келажак бунёдкорлари!» III экология ва туризм халқаро қурултойининг тантанали очилиш маросими бўлиб ўтди.
Қадимий ва муҳташам Оқсаройда бўлиб ўтган тадбирни Экология, атроф-муҳитни муҳофаза қилиш ва иқлим ўзгариши вазири ўринбосари Искандар Қутбиддинов ва Қашқадарё вилояти ҳокими Муроджон Азимов очиб берди.
Искандар Қутбиддинов ўз нутқида Давлатимиз раҳбари бошчилигида ёшларнинг орзу-интилишлари, қобилият ва салоҳиятини рўёбга чиқариш давлат сиёсатининг энг муҳим ва устувор йўналишига айланганини алоҳида таъкидлади. Шунингдек, юртимизда очилган Марказий Осиё атроф-муҳит ва иқлим ўзгаришини ўрганиш университети («Греэн Университй») экология соҳасига бефарқ бўлмаган, табиатга ғамхўрлик қиладиган ёшларга бу борада етук кадрга айланиш имконини беришини қайд этди.
«Бугунги қурултой ҳам ёшларнинг иқтидорини, салоҳиятини юзага чиқариш, янгидан-янги ғояларни кашф қилиш, ёшларни экология ва туризм соҳалари ривожи учун бирлаштиришга хизмат қилади», - деди Искандар Қутбиддинов.
Қашқадарё вилояти ҳокими Муроджон Азимов сўнгги йилларда ёшларимиз учун ҳар бир соҳада кўплаб имкониятлар яратиб берилаётганини айтиб ўтди.
Тадбир давомида ўтган йили сайланган «Ёш экологлар» ҳаракати ҳамда Ёш туризм элчилари тақдирланди ва самарали фаолиятлари учун миннатдорлик билдирилди. Бу галги қурултойда янги элчилар сайланади.
Маросимда, шунингдек, қадимий Кешда (ҳозирги Шаҳрисабз) туғилган Соҳибқирон Амир Темур сиймосидаги тарихий чиқишлар, концерт дастури, кўргазмали шоулар намойиш этилди.
Маълумот учун, қурултойда юртимизнинг барча ҳудудларидан ташриф буюрган жами 1000 нафардан ортиқ ёшлардан иборат жамоалар иштирок этмоқда. 13 августга қадар экология ва туризм соҳаларда мутахассислар иштирокида ўқув семинарлар, интеллектуал ўйинлар, дўстлик тадбирлари, «Энг яхши экологик лойиҳа», «Энг яхши туризм лойиҳаси» ва «Сиз эко-қонунларни биласизми?» танловлари, «Эко-туризм-квест», «Юлдузлар ташрифи» ва «Туғилган кун» лойиҳалари, ёш дизайнерларнинг кўргазмаси, «Опен аир» (очиқ осмон) форматида кинофильмлар намойиши, «Чиқиндисиз дунё учун» плоггинг акцияси, «Ёшлар спартакиадаси» оммавий спорт ўйинлари ҳамда унинг доирасида миллий ва этноспорт турлари бўйича спорт мусобақалари, юқори натижаларга эришган ҳамда ёшларга ўрнак кўрсатадиган спортчилар ва мураббийлар иштирокида «маҳорат дарси», «Ёш экологлар» ҳаракати ҳамда Ёш туризм элчилари Кенгаши аъзолигига сайловлар, Шаҳрисабздаги Оқсарой меъморий ёдгорлиги бўйлаб саёҳатлар бўлиб ўтади.
Қурултой якунида фаол иштирок этган гуруҳлар ва ҳудуд жамоалари вакиллари диплом ҳамда эсдалик совғалари билан тақдирланади. Шу билан бирга, қурултой иштирокчиларининг ҳар бирига Экология, атроф-муҳитни муҳофаза қилиш вазирлигининг махсус сертификати топширилади.