Саида Мирзиёева: "Ўзбекистон тўхтаб қолмайди. Биз эндигина бошладик"

Ўзбекистон масштабли ўзгаришларнинг эндигина бошида турибди. Президент администрацияси раҳбари Саида Мирзиёева Alter Ego лойиҳасига берган интервьюсида шу ҳақда айтиб ўтди.

Ўзбекистон ислоҳотлар чўққисига чиқдими ёки бир жойда тўхтаб қолдими, деган саволга Саида Мирзиёева бундай ёндашувни рад этди: «Қўйсангиз-чи. Менимча, ҳеч қачон тўхтаб қолиш бўлмайди. Биз эндигина бошладик».

«Ишларни йўлга қўйдик ва оз бўлса-да, қандайдир енгилликни ҳис қила бошладик. Бизнес қилиш анча осонлашди», — деди у.

Шу билан бирга, у муаммолар ҳали ҳам кўплигини, айниқса, ҳудудларда қийинчиликлар борлигини таъкидлади: «Мен вилоятларга бораман, жуда кўп қийинчиликлар борлигини кўраман. Ҳа, муаммолар жуда кўп, давлатнинг имкониятлари эса кичик. Тўғри тушунинг, биз имкониятлари чекланган мамлакатмиз».

«Чекиланган имкониятлар» деганда нимани назарда тутганини изоҳлар экан, Саида Мирзиёева географик, молиявий ва инфратузилмавий омилларни санаб ўтди.

«Денгизга чиқишимиз учун иккита мамлакатни босиб ўтиш керак… Пулсиз ҳеч нарсани ҳал қилиб бўлмайди. Ҳамма нарса — пул», — деди у.

Унинг сўзларига кўра, мамлакатдаги инфратузилма анча эскирган. «Бу нафақат Ўзбекистоннинг, балки бутун постсовет ҳудудининг муаммоси, деб ўйлайман. Инфратузилма совет давридан — 70, 60, 50-йиллардан қолиб кетган. Буларнинг барчасини ислоҳ қилиш учун катта, жуда катта маблағ керак. Биз босқичма-босқич кетяпмиз».

Сув — энг асосий устувор вазифа

Саида Мирзиёева Президент администрациясида бешта устувор йўналиш белгилаб олинганини айтди. Энг асосий устувор вазифа — сув.

Унинг қайд этишича, бу мамлакат учун «яқин келажакдаги» жиддий муаммо, гарчи бу ҳақда омма олдида кўп гапирилмаса ҳам.

«Эътибор кам қаратиляпти, деб бўлмайди. Биз бу ҳақда кам гапиряпмиз, шекилли. Мана шу ерда биз бироз оқсаяпмиз. Лекин аслида бу — администрациямиз диққат марказидаги энг асосий масалалардан бири».

Бошқа устувор йўналишлар қаторида у таълим, тиббиёт, бизнес ва суд тизимини санаб ўтди: «Шаффоф ва адолатли суд тизимисиз буларнинг ҳеч бирига эришиб бўлмайди».

«Мен бу ерда «хўжакўрсин»га ўтирганим йўқ»

Ислоҳотларга бўлаётган қаршиликлар ва жойлардаги ҳақиқий аҳволдан қанчалик хабардор экани сўралганда, Саида Мирзиёева бу борада жамоаси ва маълумотларни текшириш тизимига суянишини айтди.

«Мен доим айтаман: болалар, мен бу ерда «хўжакўрсин»га ёки чиройли гаплар гапириш учун ўтирганим йўқ. Бу ерда, администрацияда реал вазиятни билиш учун ўтирибман», — деди у.

У маълумотни бузиб кўрсатишга уринишларни маънисиз иш деб атади. «Нимага? Бундан нима маъно? Мен барибир билиб оламан. Барибир ҳақиқатнинг тагига етаман… Агар бирор киши ҳисобот берса, менда, албатта, иккинчи томон ҳам бор. Менда разведка жуда зўр ишлайди».

«Ҳар бир кейс — тизимни яхшилаш учун имконият»

Кўп масалаларни ҳал қилиш учун шахсан аралашиш талаб этилаётгани ҳақидаги вазиятга изоҳ берар экан, Саида Мирзиёева буни иш жараёни сифатида қабул қилишини айтди.

«Биз ишлашимиз керак… Ҳозир вазият шунақа, эртага бошқача бўлади ва сўзсиз яхшироқ бўлади, чунки биз бу ишни йўлга қўямиз».

Айтишича, ҳар бир конкрет ҳолатга унинг жамоаси «тизимни тартибга солиш имконияти» сифатида қарайди.

Администрация раҳбари турли соҳалардаги муаммолар — суд тизимидан тортиб бизнес, таълим ва гендер масалаларигача — бир-бири билан чамбарчас боғлиқ эканини таъкидлади.

«Менга халқаро дипломатия ёқади»

Саида Мирзиёева ўзи учун нима билан шуғулланиш энг қизиқ экани ҳақида гапирар экан, уни энг кўп халқаро дипломатия ўзига тортишини айтди.

«Мен бир умр, болалигимдан дипломат бўлишни орзу қилганман. Одамлар билан мулоқот қилиш, алоқаларни йўлга қўйиш — бу менинг қўлимдан энг яхши келадиган иш. Бу талант бўлса керак».

Шу билан бирга, у ишнинг катта қисми «комфорт зона»дан чиқишни талаб қилишини қайд этди: «Мен доим комфорт зонадан чиқаман. Қаерда ўзимни қулай ҳис қилсам, ўша ер менга ноқулай туйилади. Қаерда ички қаршиликни ҳис қилсам, демак, ўша ерда ўсяпман».

«Мен турли идеология ва ҳикматларни хуш кўраман. Жуда кўп ўқийман ва ўзимнинг, айтайлик, қатъий догмаларимга амал қиламан. Бу — проактив яшаш дегани. Ҳаётнинг мазмуни — эзгулик улашишда. Яъни агар сен бу дунёга келдингми, сенда маълум хислатлар ва имкониятлар борми, вазифанг — фақат бериш, бериш ва яна беришдан иборат бўлиши керак. Шунда ўртада узвий боғлиқлик, табиий айланиш ҳосил бўлади».

У проактив ёндашувни энг муҳим деб атади: «Проактивлик — бу муаммони кўрганингда, уни шунчаки муаммо эмас, балки имконият деб билишингдир».