Россия ҳудудларига ҳужум: саноат зонаси ёнди, аэропортлар ёпилди...

Украина дронлари кечаси Россиянинг бир неча вилоятларига ҳужум қилди.

Ростов вилояти губернатори Юрий Слюсар ўзининг телеграм каналида хабар беришича, дронлар вилоятнинг Ростов, Чертковский ва Шолоховский туманларига ҳужум қилган, зарбалар ҳаво ҳужумидан мудофаа кучлари ва ўт очувчи мобил гуруҳлар томонидан "муваффақиятли қайтарилган". Губернаторнинг дастлабки маълумотларига кўра, жабрланганлар йўқ.

Бундан олдин Ростов ва вилоят телеграм каналларида кучли портлаш овозлари - тахминан ҳудуднинг бир неча туманларида ҳаво мудофааси ишлаётгани ҳақида хабарлар пайдо бўлганди.

Калуга вилояти раҳбари Владислав Шапша объектнинг номини айтмаган ҳолда, вилоятнинг Дзержинский туманидаги саноат объектида ёнғин бошланганини маълум қилди. Ёнғин дрон бўлакларининг қулаши оқибатида келиб чиққан.

Яндекс маълумотларига кўра, вилоятнинг Дзержинск туманида "Биринчи завод" нефтни қайта ишлаш заводи жойлашган бўлиб, у илгари ҳам дронлар ҳужумига учраган.

Шанба куни эрталаб Росавиатсия Россиянинг еттита шаҳри: Астрахан, Владикавказ, Волгоград, Грозний, Калуга, Саратов ва Уляновск аэропортларида самолётларни қабул қилиш ва жўнатиш вақтинчалик чеклангани ҳақида хабар берди. Идора хабарномасида чекловлар хавфсизликни таъминлаш зарурати билан изоҳланган. Кейинроқ Росавиатсия Волгоград аэропорти ўз ишини қайта бошлаганини маълум қилди.

Мудофаа вазирлиги маълумотларига кўра, ҳаво ҳужумидан мудофаа кучлари Волгоград вилояти устида 17 та пилотсиз учиш аппаратини йўқ қилган. Минтақа губернатори Андрей Бочаровнинг айтишича, Украина пилотсиз учиш аппаратлари номи айтилмаган саноат объектига "оммавий ҳужум" уюштирган, натижада 5 квадрат метр майдонда ёнғин келиб чиққан ва унинг маълумотларига кўра, ёнғин тезда ўчирилган.

Бу орада Astra маҳаллий аҳолига асосланиб, 15 февралга ўтар кечаси Волгограддаги кўп қаватли турар жой биносига пилотсиз учиш аппарати келиб урилганини ёзмоқда.