“Қуён”ни расмни чизган қарздор ота топилди
Ота-она фарзанди то вояга етгунга қадар унинг моддий таъминотини таъминлаш елкасидаги бурчидир. Бироқ, айрим ҳолларда бу маъулиятни унутган қўштирноқ ичидаги оталар ҳам борки, уларга қарата “садқаи одам кет” дегинг келади. Янгиқўрғон туманида туғилган, эндигина 37 ёшни қарши олган Акмал Тўйчибоев ҳам ана шундайлар сирасига киради.
Бўлмаса, ширин оиласи билан ажрашиб, шириндан-шакар 3 нафар фарзандларини турмуш ўртоғи отасиз ўстирмас эди. Оилавий келишмовчиликлар охир-оқибат, турмуш ўртоғи билан юз кўрмас бўлиб кетишга олиб келди. Суднинг қарори билан қарздор отадан фарзандлар моддий таъминотини ўз вақтида бериб туриш белгиланди.
Аммо, Бюронинг Янгиқўрғон туман бўлими иш юритувига келиб тушган мазкур ҳужжат ижросини таъминлаш осон кечмади. Бир неча бор огоҳлантиришга қарамай А.Тўйчибоев алимент бериш ўрнига, қочиб, яшириниб юрди. Халқимизда “бузоқни югургани сомонхонагача” деган нақлни гўёки унутган шекилли қарздор берибир топа олмайди деб беркиниб юрди. Куни кеча Бюронинг вилоят бошқармаси қидирув шўъбаси ходимлари томонидан олиб борилган тадбирларда А.Тўйчибоев Тошкент шаҳридан топилди.
Наманган вилоятига олиб келиниб, фарзандлар таъминоти учун тўпланиб қолган салкам 55 млн сўм қарздорликни бартараф этиш юзасидан имкон берилди. Лекин, минг афсуски у бундан хулоса қилмади. Жиноят ишлари бўйича Янгиқўрғон туман суди томонидан 15 суткалик маъмурий қамоқ жазоси тайинланди. Ана энди А.Тўйчибоев хулоса қилар.
