Қирғизистон фуқароларини Тожикистонга бормасликка чақирди
Қирғизистон Ташқи ишлар вазирлиги фуқароларга Тожикистонга ҳар қандай саёҳатдан вақтинча воз кечишни тавсия қилди. Бу ҳақда вазирлик манбаларига таяниб, 24.kg хабар берди.
Маълум қилинишича, Тожикистон ҳудудига расмий хабарномасиз киришни чеклашда давом этмоқда. Қирғизистоннинг Душанбедаги элчихонаси халқаро аэропортга етиб келган фуқароларни Тожикистон чегарачилари мамлакатга киритмагани ҳақида хабар берди.
Шу билан бирга, авиачипталарни сотиб олиш ва транзит зонасида қайтиш парвозини кутиш билан боғлиқ қўшимча молиявий харажатлар юзага келмоқда. Охирги марта бундай огоҳлантириш Қирғизистон Ташқи ишлар вазирлиги томонидан 2022 йил 22 декабрда эълон қилинган.
2022 йил октябрь ойида ҳам қирғизистонликлардан Тожикистонга бормаслик сўралганди. Бунга Тожикистонда Душанбе халқаро аэропортидаги назорат-ўтказиш пунктида Қирғизистон фуқароларининг кириши асоссиз чекланиши сабаб бўлган.
Тожикистон ҳудудида қирғизларнинг ҳуқуқлари бузилган ёки уларга нисбатан нохолис қарашлар намоён бўлган тақдирда, Қирғизистон ТИВ Консуллик бошқармасига мурожаат қилиш сўралган.
Маълумот ўрнида, ноябрь ойида Қирғизистоннинг чегарага яқин аҳолисига ватан ҳимояси учун қурол ишлатишга рухсат берилиши ҳақида хабар берилган.
