Қидирувдаги ота ва қизчаси топилди

Оила муқаддас даргоҳ. Оиладаги тотувлик ва аҳиллик кишининг ҳаётга муҳаббат, касбга садоқат, атрофдаги инсонларга нисбатан ҳурмат ва эътибор сингари юксак инсоний фазилатларни ҳам шакллантиради.

Афсуски, сўнги вақтларда арзимаган оилавий келишмовчиликлар сабаб оилалар парокандаликка юз тутиб, ажримлар сони ортмоқда.

Мисол учун, Бюронинг Ғиждувон туман бўлими иш юритувидаги Фуқаролик ишлари бўйича Ғиждувон туманлараро судининг 25.02.2022 йилдаги суд буйруғига асосан қарздор Э.Нематовдан ундирувчи С.Хайридинова фойдасига 1 нафар вояга етмаган фарзанди таъминоти учун қарздорнинг иш ҳақи ва бошқа даромадининг 1/4 қисм миқдорида алимент ундириш белгиланган бўлсада, қарздор ота турли баҳоларни рўкаж қилиб, алимент тўловларини тўлашдан бўйин товлаб келган.

Қарздор отанинг алимент тўловларини ўз вақтида тўламаганлиги етмагандай, 2017 йилда туғилган қизчасини олиб, номаълум томонга кетиб қолган.

Ночор қолган она фарзандини ўз тарбиясига олиш ҳақида судга мурожаат қилишга мажбур бўлган. Суд ҳолатни ўрганиб чиқиб, вояга етмаган қизча онасининг парваришига муҳтожлигини инобатга олиб, даъвони қаноатлантирган.

Мазкур суднинг 18.08.2022 йилдаги ижро варақасига асосан отаси тарбиясида бўлган қизчани онаси тарбиясига олиб бериш тўғрисидаги ижро ҳужжати иш юритувига келиб тушган ва ижро ҳаракатларига киришилган.

Ижро ҳаракатлари давомида қарздор алимент ундируви билан боғлиқ ижро ҳужжати талабларини бажаришдан бўйин товлаб, 2017 йилда туғилган қизчасини олиб, Бюро органларидан яширинганлиги сабабли давлат ижрочисининг 17.10.2022 йилдаги қарорига асосан қарздор ва болага нисбатан қидирув эълон қилинган.

Бюронинг қидирув ходими Ж.Бобоқулов томонидан олиб борилган тезкор-қидирув тадбирлари давомида қидирувдаги қарздор ота Навоий шаҳридаги сомсахоналарнинг бирида ишлаб келаётганлиги тезкор йўллар билан аниқланиб, жорий йилнинг 15 ноябрь куни ўтказилган тезкор тадбир давомида қидирувдаги қарздор ота ушланган.

Қарздор ота қизчаси ҳақида ҳеч нима билмаслигини билдирган бўлсада, қидирув ходимлари томонидан олиб борилган қидирув тадбирлари натижасида қидирувдаги қизча Навоий шаҳридаги хусусий боғчада эканлиги аниқланган ҳамда тегишли органлар вакиллари ва холислар иштирокида соғ-саломат онаси тарбиясига олиб берилган.

Қарздор отанинг алимент тўловларидан бўлган қарздорлиги қайта ҳисоб-китоб қилинганда, 2022 йил 01 ноябрь ҳолатида 10,6 млн. сўмни ташкил қилганлиги ва алимент тўлашдан бўйин товлаганлиги сабабли унга нисбатан тегишли ҳужжатлар расмийлаштирилиб, кўриб чиқиш учун Жиноят ишлари бўйича Ғиждувон туман судига юборилган.
Мазкур суд томонидан қарздорга нисбатан тўпланган маъмурий иш ҳужжатлари очиқ суд мажлисида кўриб чиқилган ҳамда Ўзбекистон Республикаси МЖтКнинг 474-моддасида кўрсатилган ҳуқуқбузарликни содир этган деб топилиб, унга нисбатан 15 сутка маъмурий қамоқ жазоси тайинланган.