"Қамчиқ"да поездни электр қуввати билан таъминловчи таянч устуни қулаб тушди
“Қамчиқ” довонида кузатилган сел-тошқин бир қанча оқибатларни олиб келди. Бу ҳақда ФВВ матбуот хизмати хабар қилмоқда.
Маълум қилинишича, жорий йилнинг 4 май куни соат 21:30 ларда “Қамчиқ” довонида кузатилган кучли ёғингарчилик оқибатида “Ангрен-Поп” электрлаштирилган темир йўлининг 19 км. "Кўл" стансиясига олиб борувчи автомобил йўлининг ювилиши оқибатида поездни электр қуввати билан таъминловчи таянч устуни қулаган.
Юзага келган вазият оқибатларини бартараф этиш мақсадида тезкор штаб тузилиб, "Қамчиқ" МҚЁҚБ ва “Ўзбекистон темир йўллари” АЖ махсус авария-тиклаш бригадаси ва муҳандислик техникалари билан йўлда таъмирлаш ишлари олиб борилиб, электр таянч устуни, ҳамда йўл остидан қўшимча сел ўтказгич қуриш ишлари амалга оширилди.
Шунингдек, автомобил йўлида сел, тошқин оқибатларини бартараф этиш ва ёғингарчилик сувларини беталофат ўтказиб юбориш мақсадида, сув ўтказиш иншоотларини ва кюветларни тозалаш тадбирлари олиб борилди. Довон ҳудудида ҳодиса оқибатларини бартараф этиш тадбирлари давом этмоқда.
