Путин Сини коммунизм билан табриклади: Хитой раҳбари Россия билан алоқаларни кенгайтиришга тайёр
Хитой давлат оммавий ахборот воситаларининг хабар беришича, Президент Си Цзиньпин россиялик ҳамкасби ва иттифоқчиси Владимир Путинга ҳамкорликни «кенгайтиришга» тайёрлигини айтган.
Си шунингдек, ўзининг ва Путиннинг сўнгги йилларда «бир аср мобайнида кўрилмаган катта ўзгаришлар шароитида» алоқаларни мустаҳкамлаш борасидаги саъй-ҳаракатларини олқишлади.
«Икки томон ўртасидаги сиёсий ўзаро ишонч чуқурлашишда давом этди, амалий ҳамкорлик ажойиб натижаларга эришди», — деди у.
Бу гаплар Хитойда Коммунистик партия ҳукмронлигининг 75 йиллиги ва ундан сўнг икки томонлама дипломатик алоқалар ўрнатилганининг нишонланиши чоғида айтилди.
Сини юбилей билан табриклаган Путин, Россия Хитой Халқ Республикасини тан олган биринчи давлат эканини айтди.
Си Путиннинг энг яқин иттифоқчиларидан бири. 2022 йилда Пекин ва Москва Россия Украинага кенг миқёсли бостириб кириши арафасида муносабатларини «чегарасиз» деб таърифлаган эди.
Ўшандан бери Хитой Ғарб етакчилари томонидан босимга учраган ва улар Си Цзиньпинни Украинадаги урушни тугатиш учун Путинга таъсир ўтказишга ундайди.
