Нидерландия Россия ҳарбий разведкаси жосусини фош этганини эълон қилди​​​​​​​

Нидерландия умумий разведка ва хавфсизлик хизмати Россия бош разведка бошқармаси агентини қўлга олганини эълон қилди. У Гаагадаги халқаро жиноий судда ишламоқчи бўлган.

Разведка маълумотларига кўра, жосуснинг исми Сергей Владимирович Черкасов, у Виктор Мюллер Феррейра номига олинган Бразилия ҳужжатларидан фойдаланган. Пресс-релизда қайд этилишича, бу каби жосуслар узоқ йиллик тайёргарликдан ўтади ва уларни фош қилиш жуда қийин. Россиянинг ноқонуний агентлари ўзларини бошқа давлат фуқаролари сифатида кўрсатади. Бундан кўзланган мақсад россияликлар олиши мумкин бўлмаган маълумотларни қўлга киритишдан иборат.

Шу билан бирга ушбу амалиёт қандай ўтказилгани маълум қилинмаган. РФнинг расмий органлари ҳозирча бу ҳолатга ҳеч қандай изоҳ бермади.

Бразилия федерал полицияси пресс-релизига кўра, россиялик 2010 йилда Рио-де-Жанейрога келган ҳамда сохта ҳужжатлар билан ўзини бразилиялик деб таништирган. У янги исм билан бир неча йил Ирландия ва ақшда яшаган, шундан кейин Бразилияга қайтган. Гумонланувчи Нидерландияга кетиш ва халқаро судга ишга жойлашишга тайёргарлик кўрган. Судда у дастлабки суриштирувлар бўлимида кичик таҳлилчи ходим сифатида ишлашни мўлжалланган.

2022 йил апрелида Черкасовнинг Нидерландияга кириши тақиқланади ва у Бразилияга қайтиб келади. Бу ерда у сохта ҳужжатлардан фойдаланганлик учун судга тортилади.

“Бу бош разведка бошқармасининг узоқ муддатли операцияси бўлиб, унга кўп вақт, энергия ва пул сарфланган”, – деган Нидерландия умумий разведка ва хавфсизлик хизмати раҳбари Эрик Акербом.

Нидерландияликларнинг фикрича, Черкасов халқаро жиноий суднинг Украина ва Грузия бўйича ҳужжатларини қўлга киритишни мақсад қилган. Махсус хизматлар бу маълумотлар рус разведкаси учун алоҳида қимматга эга бўлиши мумкинлиги таъкидлаган.

Пресс-релизда «Виктор Мюллер Феррейра» ўзининг тўқима оиласи ҳақида гапириб бергани тўғрисидаги ҳужжат илова қилинган. Нидерландия разведкаси бу ҳужжатнинг мураккаб тузилганига эътибор қаратган.

Bellingcat суриштирув гуруҳи аъзоси Арик Толер эҳтимолий жосуснинг Facebook саҳифаси, резюме ва блоги скриншот тасвирларини эълон қилган. Ундаги маълумотларга асосан, у Дублиндаги Тринити-коллеж (Ирландиянинг энг қадимий таълим муассасаси) ва Американинг Жон Хопкинс университети юқори халқаро тадқиқотлар мактабида ўқиган.

Bellingcat маълумотларига кўра, Сергей Черкасов асли калининградлик. «Осторожно, Новости» Telegram-канали унинг Болтиқ балиқ саноати флоти давлат академиясида таҳсил олган пайтида тушган суратини эълон қилган.