Наманганда фуқаро ўз қариндошини қасддан ўлдирди

Тўрақўрғон туманининг «Соҳибкор» маҳалласида яшовчи Исмат Алиназаров (исм-шарифлар ўзгартирилган) ёшлигидан анчайин манман, калондимоғ бўлиб улғайди. У ўтган йилнинг август ойи охирларида уйига меҳмон бўлиб келган тоғасига қўл кўтарди.

Исматнинг бу қилиғи қариндош-уруғларини қаттиқ ранжитди. Кўп­чиликнинг ундан кўнгли қол­ди. Айнан ана шу воқеа сабаб у 2021 йил 5 сентябрь куни яна бир қариндоши Ботир Абдулҳамидов билан ҳам жанжаллашиб қолди.

Афсуски, бу жанжалнинг охири фо­жиали якун топди.

Воқеа тафсилотига тўхталадиган бўлсак, ўша куни И. Алиназаров дў­конга борганида Ботир унга киноя­ли сўз қотади:

— Тоғасини урган «полвон», ишлар қалай?

Табиийки, бу гап Исматга ёқ­май­ди. Пировардида иккаласи мушт­­лашиб кетишади. Лекин атрофдагилар уларни ажратиб қўйишади. Ботир у билан жанжаллашмаслик мақсадида уйига кириб кетади. Би­роқ И. Алиназаров уни телефон орқали ҳақорат қи­либ, сў­кишда давом этади. Қолаверса, ўртадаги зиддиятга ойдинлик киритиш мақсадида қа­риндошини ту­маннинг «Олчин» ма­­ҳалласи марказига чақиртириб, бир неча маротаба қўнғироқ қилади. Жавоб бўлмагач, SМS хабарлар юборади. Аммо Б. Абдул­ҳамидов ке­йинчалик телефон аппаратини ўчириб қўяди. Бу эса зўравон йигитга жуда алам қилади. На­­ти­жада у ғазабланиб, Ботирнинг ака­си Баҳром Абдулҳамидовга телефон қилади. Улар ўзаро баҳслашиб, орани очиқ қилиш учун туманнинг жа­нубий чегарасидан оқиб ўтувчи Сирдарё дарёси бўйида учрашишга келишади.

Эртаси куни Исмат уйидан чиқиб кетаётган вақтида укаси Жавоҳир Алиназаров кечқурун бўлиб ўтган воқеа тафсилотини сўрайди.

— Майли, ўтган ишга саловат. Сиз борманг, Баҳром ака ва Ботир би­лан ўзим гаплашаман, — дейди Жа­воҳир.

Шунинг учун акасини уйда қолдириб, ўзи Баҳромнинг уйи томон йўл олади.

Манзилга яқинлашганда Баҳром тоғаси Азамат Ак­ром­алиев билан кўчада турганига кўзи тушади. Ж. Алиназаровга тоға-жиян гўёки акаси Ис­матни сўроқ-савол қи­лиш учун йиғилишгандек туюлади. Шу боис у акасига қўнғироқ қи­­­либ, бу ҳақда хабар беради. Сўнг­ра Баҳром ва Азаматнинг ёнига боради. Шу пайт Б. Абдулҳа­мидов бор кучи билан Ж. Алиназаровнинг юзига мушт туширади. Оқи­батда у ҳушини йўқотиб, ерга йиқилади.

Укасининг қўнғироғидан кейин ғазаб отига минган И. Алиназаров ошхонада турган ўткир пичоқни олиб, киракаш машинада Баҳром Абдулҳамидовнинг олдига жў­найди.

Исмат етиб келгач, укаси Жа­во­ҳирнинг ерда қимирламай ёт­га­нини кўриб, «Укамни ўлдириб қў­йибди» деган фикрга боради. Шу боис машина­дан туша солиб, куракда турмайдиган сўзлар билан сўкинганча Баҳромга ташланади ва ёнидаги пи­чоқни олиб, унинг кўкрак қафаси ва ўнг елка қисмига зарб билан санчади. Оғир жароҳат олган Б. Абдулҳамидов во­қеа жойида вафот этади. Пировардида қотил шу куниёқ қўл­га олиниб, унга нисбатан жи­ноят иши қўз­ғатилди. Тергов жа­­раё­нида Исматнинг хонадонидан соф вазни 3,22 граммга тенг «Марихуана» гиёҳвандлик моддаси ҳам топилади.

Шундан сўнг ҳар икки жиноят иши жиноят ишлари бўйича Тўра­қўрғон тумани судида кўриб чиқилди. Суд И. Алиназаровни Жиноят кодексининг 97 (қасддан одам ўлдириш) ва 276-модда (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) лари 1-қисмига асосан айбдор деб топиб, узоқ муддатга озодликдан маҳрум этиш жазоси та­йинлади.

Хулоса ўрнида айтиш мумкинки, манманлик ва ўжарлик каби иллатлар ҳамиша инсонга панд бериб, аянчли қисматларга гирифтор этиб келган.

Жаҳли чиққанда ўзи­ни босолмаслик эса, бундан ҳам хавфлироқдир. Шу боис оила, маҳалла ва бутун жамиятимизда ана шундай иллатларга қарши қатъий курашиш зарур. Юз берган қотиллик барчани ҳушёр торттириши, ҳа­миша огоҳ бўлишга ундайди. Зеро, жиноятчиликнинг олдини олишга барча бирдек масъулдир.

Отабек СИДДИҚОВ,

жиноят ишлари бўйича

Тўрақўрғон тумани суди раиси