Наманган костюмларининг хорижда ҳам харидорлари бор

Наманганда фаолият юритаётган Орзу кичик саноат зонасида енгил саноат, озиқ-овқат, тиббий техника, полиграфия, полиэтилен пакет ва плёнкалар, энергия тежамкор лампа ишлаб чиқаришга оид умумий қиймати 142 миллиард сўмликдан зиёд 22 та лойиҳани амалга ошириш режалаштирилган эди.

Мазкур лойиҳаларнинг биринчи босқичи 2018 йил сўнгги чорагида иш бошлаган. Жумладан, Porloq tekstil liboslari , Nurobod sifat tekstil , Ulug -B , White gold towel textile , Kvars sanoat servis , Bosir tekstil servis , Sug diyona fayz tekstil , Universal Food Trade , Меga eко plast каби корхоналар ишга туширилиб, 1000 га яқин иш ўрни яратилди.

Орзу кичик саноат зонасидаги барча лойиҳалар ҳаётга тўлиқ татбиқ этилгач, йилига 82 миллиард сўмликдан зиёд маҳсулот ишлаб чиқариш қуввати пайдо бўлади ва 4 мингга яқин киши иш билан таъминланади. Ишлаб чиқарилаётган маҳсулотларнинг асосий қисми экспортга йўналтирилади.

Идеал Текстил Орзу МЧЖ мазкур ҳудудда экспорт борасидаги қалдирғоч корхоналардан бири.

Маҳсулотимизга германиялик ишбилармонлар катта қизиқиш билдирмоқда, дейди корхона раҳбари С.Халилов. Айни пайтда улар билан шартномалар тузиш бўйича ташкилий-ҳуқуқий масалалар устида иш олиб борилмоқда. Тез орада Made in Uzbekistan бренди остида Идеал ёрлиғи билан жўнатилган костюм ва курткаларимиз Германия бозорига кириб боради. Президентимиз томонидан экспорт масаласига қаратилаётган катта эътибор ҳамда экспортчи корхоналарга берилаётган имтиёзлар биз, тадбиркорлар учун кенг имкониятлар яратмоқда. Келажакда экспорт географиясини янада кенгайтиришни мақсад қилганмиз.

Идеал Текстил Орзу корхонасида қисқа вақт ичида бир ярим гектардан зиёд майдонда қиймати 22 миллиард сўмлик лойиҳа амалга оширилди. Жумладан, 8 миллиард сўмлик қурилиш-монтаж ишлари бажарилди ва 14 миллиард сўм ускуналар сотиб олиш ва жиҳозлашга сарфланди. Бунда албатта, Алоқабанк нинг 16 миллиард сўмлик имтиёзли кредити тадбиркорга мадад бўлди.

Корхонада Германия, Япония, Туркия, Хитой каби давлатлар технологияси асосида эркаклар костюми ва курткалари ишлаб чиқарилмоқда. Йилига 250 минг дона турли ассортиментдаги кийим-кечак ишлаб чиқариш қувватига эга корхонада тайёрланган сифатли ва хушбичим маҳсулотларнинг 60 фоизини ташқи бозорга чиқариш мўлжалланмоқда. Бу дастлабки ҳисоб-китобларга кўра, 2,7 миллион долларни ташкил этади.

Manba: uza. uz