Мўйноқда қидирувдаги отадан алимент қарзи ундирилди

Мажбурий ижро бюроси Мўйноқ туман бўлими иш юритувида фуқаролик ишлари бўйича Қўнғирот туманлараро судининг 03.06.2014 йилги суд буйруғига асосан қарздор Е.Генжемуратовдан ундирувчи К.Каипованинг фойдасига, унинг тарбиясидаги бир нафар фарзандининг таъминоти учун даромадларининг 1/2 қисми миқдорида алимент нафақасини ундириш тўғрисидаги ижро ҳужжати мавжуд эди.

Мазкур ижро ҳужжати иш юритувга келиб тушган куннинг ўзида қарор чиқарилиб, ижро иши юритуви қўзғатилган.

Ўз фарзандига аталган алимент пуллари афсуски, қарздор ота томонидан 2014-2015 йиллар давомида умуман тўланмаган.

Мажбурий ижро ҳаракатлари давомида, қарздор ўз яшаш жойини ўзгартириб юборганлиги аниқланиб, унга нисбатан қидирув эълон қилинган ва қарздорнинг чет элга чиқиш ҳуқуқлари вақтинча чекланган.

Лекин, жорий йилнинг 26 майда бўлим давлат ижрочиларининг саи-ҳаракатлари билан, сал кам 5 йилдан буён қидирувдаги отадан 9 млн. сўм алимент қарздорлиги нақд кўринишида тўлиқ ундирилиб, ундирувчи К.К.нинг қонуний манфаатлари қаноатлантирилди.