Мутахассислар жазирамадан огоҳлантиришнинг янги рангли шкаласини тақдим этди

АҚШ Миллий метеорология хизмати ҳамда касалликларни назорат қилиш ва олдини олиш маркази мутахассислари саломатлик учун хавфли жазирамадан огоҳлантиришнинг янги рангли шкаласини тақдим этди, дея хабар берди Associated Press янгиликлари нашри.

Шкалага ўта юқори ҳароратни англатувчи янги — сиёҳранг (бинафшаранг) қўшилди.

Эски шкалада оқ, сариқ, тўқ сариқ ва қизил ранглар бор эди: оқ — ҳарорат саломатлик учун хавф солмаслигини, қизил — танани совитиш учун шароит ва ичишга сув бўлмаса ҳаво ҳарорати саломатлик учун хавфлилигини англатган.

Сиёҳранг — нафақат одамларнинг саломатлиги, балки ҳаёти ҳам хавф остида эканини ифодалайди. Огоҳлантиришнинг ушбу даражасини иссиқлик стресслари узоқ давом этса ва ҳатто кечалари ҳам пасаймаса эълон қилиш режалаштирилган.

Мутахассислар жазираманинг беш тоифаси юқори аниқликдаги илмий ҳисоб-китобларга асосланганини таъкидлашяпти. Ҳарорат ранг чегаралари об-ҳаво ва иқлим ҳақидаги маҳаллий маълумотлар, юқори ҳарорат сабабли қайд этиладиган тиббиёт статистикаларидан келиб чиққан.